വൈദ്യുതി നിരക്കുകളില്‍ ഇളവ്

തിരുവനന്തപുരം: കൂട്ടിയ നിരക്കുകളില്‍ വൈദ്യുതിബോര്‍ഡ് ചെറിയ കുറവ് വരുത്തി. എതിര്‍പ്പിനെ തുടര്‍ന്നാണിത്. രണ്ടാഴ്ചക്ക് മുന്‍പാണ് വൈദ്യതി ബോര്‍ഡ് നിരക്കുകള്‍ കൂട്ടിയത്.

ബില്ലടയ്ക്കാന്‍ താമസിച്ചതുകൊണ്ട് വൈദ്യുതി കട്ട് ചെയ്താല്‍ പുനഃസ്ഥാപിക്കാനുള്ള ഫീസ് 30 രൂപയാക്കി കുറച്ചു. അഞ്ചുരൂപയില്‍ നിന്ന് 50 രൂപയായി കൂട്ടിയ നിരക്കാണിത്. ഇതിനകം 50 രൂപ പിഴയായി അടക്കേണ്ടിവന്നിട്ടുള്ളവര്‍ക്ക് ബാക്കി 20 രൂപ അടുത്തമാസത്തെ ബില്ലില്‍ കുറവു ചെയ്യും.

ലോടെന്‍ഷന്‍ ഒഴികെയുള്ള പുതിയ കണക്ഷനു പത്തു രൂപ നല്‍കിയാല്‍ മതി. ഈയിനത്തില്‍ രണ്ടുരൂപയായിരുന്ന അപേക്ഷഫീസ് 50 രൂപയായാണ് ഉയര്‍ത്തിയിരിക്കുന്നത്. താരിഫ് മാറ്റല്‍, ഉടമസ്ഥാവകാശം മാറ്റല്‍, മീറ്റര്‍ മാറ്റിവയ്ക്കല്‍, കൂടുതല്‍ കണക്ടഡ് ലോഡ് സ്ഥാപിക്കല്‍ തുടങ്ങിയവയ്ക്ക് പത്തുരൂപ നല്‍കിയാല്‍ മതി. ഡിസംബര്‍ 17 തിങ്കളാഴ്ച മുതലാണ് ഇത് നിലവില്‍ വന്നത്.