പദ്ധതിവിഹിതം : മന്ത്രിസഭയോഗം തീരുമാനിക്കും

തിരുവനന്തപുരം: പദ്ധതിവിഹിതം 20 ശതമാനം കുറയ്ക്കണമെന്നുള്ള ധനകാര്യവകുപ്പിന്റെ നിര്‍ദേശം ആസൂത്രണബോര്‍ഡ് യോഗം ചര്‍ച്ചചെയ്തു. എന്നാല്‍ ഇക്കാര്യത്തില്‍ അന്തിമതീരുമാനം ഡിസംബര്‍ 19 ബുധനാഴ്ച ചേരുന്ന അടിയന്തരമന്ത്രിസഭായോഗം തീരുമാനിക്കുമെന്ന് ആസൂത്രണബോര്‍ഡ് ഉപാധ്യക്ഷന്‍ വി. രാമചന്ദ്രന്‍ വാര്‍ത്താസമ്മേളനത്തില്‍ വ്യക്തമാക്കി.

ഡിസംബര്‍ 18 ചൊവാഴ്ച നടന്ന ആസൂത്രണബോര്‍ഡിന്റെ അടിയന്തര യോഗത്തിലാണ് ഈ തീരുമാനമെടുത്തത്. ഇപ്പോള്‍ 3015 കോടിയുടേതാണ് വാര്‍ഷികപദ്ധതി. ഇത് 20 ശതമാനം കൂടി കുറയ്ക്കണമെന്നതാണ് ധനകാര്യവകുപ്പിന്റെ നിര്‍ദേശം.

പദ്ധതി വെട്ടിച്ചുരുക്കാതിരിക്കാന്‍ വരുമാനം കൂട്ടാനുള്ള ശക്തമായ നടപടികള്‍ സര്‍ക്കാര്‍ എടുക്കേണ്ടിവരും. ഇനി പദ്ധതിവിഹിതം വെട്ടിച്ചുരുക്കയാണെങ്കില്‍ ഇതിനകം സമ്മതം നല്കിക്കഴിഞ്ഞ പല വികസനപദ്ധതികളും തകരാറിലാവുമെന്നും രാമചന്ദ്രന്‍ പറഞ്ഞു.

മുന്‍ സര്‍ക്കാര്‍ വരുത്തിയ കുടിശ്ശികയാണ് ഈ സര്‍ക്കാരിനെ വെട്ടിലാക്കിയത്. വില്പനനികുതിയില്‍ കാര്യമായ വര്‍ധനവുണ്ടാക്കാനുള്ള സര്‍ക്കാര്‍ ശ്രമം വിജയിച്ചില്ല. - രാമചന്ദ്രന്‍ പറഞ്ഞു.

വിദ്യാഭ്യാസമേഖലയില്‍ വന്ന അധികച്ചെലവാണ് സര്‍ക്കാരിന്റെ സാമ്പത്തികപ്രതിസന്ധിക്ക് ഒരു കാരണം. സര്‍ക്കാരിന് വരുമാനത്തോത് കൂട്ടാന്‍ കഴിഞ്ഞില്ലെങ്കില്‍ വാര്‍ഷികപദ്ധതി ഇനിയും വെട്ടിച്ചുരുക്കുന്നതിനെക്കുറിച്ച് ആലോചിക്കേണ്ടിവരുമെന്നും രാമചന്ദ്രന്‍പറഞ്ഞു.

മുഖ്യമന്ത്രി എ.കെ. ആന്റണി, ധനമന്ത്രി ശങ്കരനാരായണന്‍, വ്യവസായമന്ത്രി പി.കെ. കുഞ്ഞാലിക്കുട്ടി,കൃഷിമന്ത്രി ഗൗരിയമ്മ എന്നിവരും വാര്‍ത്താസമ്മേളനത്തില്‍ പങ്കെടുത്തു.