നിരീക്ഷകന്‍ വിളിച്ചുചേര്‍ത്ത യോഗം പാത്രിയര്‍ക്കീസ് ബഹിഷ്കരിച്ചു

കോട്ടയം: മലങ്കര അസോസിയേഷന്‍ തിരഞ്ഞെടുപ്പിന് സുപ്രിം കോടതി നിയോഗിച്ച നിരീക്ഷകന്‍ മുന്‍ ഹൈക്കോടതി ചീഫ് ജസ്റിസ് വി. എസ്. മാളീമഠ് വിളിച്ചുചേര്‍ത്ത യോഗം പാത്രിയര്‍ക്കീസ് വിഭാഗം ബഹിഷ്കരിച്ചു.

യോഗത്തിന് മുമ്പ് പാത്രിയര്‍ക്കീസ് വിഭാഗം മാളീമഠുമായി കൂടിക്കാഴ്ച നടത്തി. വോട്ടേഴ്സ് ലിസ്റ് തയ്യാറാക്കേണ്ട ഇടവക പള്ളികളുടെ എണ്ണം തുടങ്ങിയ കാര്യങ്ങള്‍ സംബന്ധിച്ച് പാത്രിയര്‍ക്കീസ് വിഭാഗം സുപ്രിം കോടതിയില്‍ നല്‍കിയിട്ടുള്ള ഹര്‍ജിമേല്‍ തീരുമാനമുണ്ടാവുന്നതു വരെ തിരഞ്ഞെടുപ്പ് നിര്‍ത്തിവെക്കണമെന്ന് പാത്രിയര്‍ക്കീസ് വിഭാഗം മാളീമഠിനോട് ആവശ്യപ്പെട്ടു.

പാത്രിയര്‍ക്കീസ് വിഭാഗം തടസവാദമുന്നയിച്ച് തിരഞ്ഞെടുപ്പ് അലങ്കോലപ്പെടുത്താനാണ് ശ്രമിക്കുന്നതെന്ന് പരിശുദ്ധ കാതോലിക്കാ ബാവ ആരോപിച്ചു. തിരഞ്ഞെടുപ്പ് നടത്തുന്നതിന് ആവശ്യമായ പിന്തുണ നല്‍കുമെന്ന് കാതോലിക്കാ വിഭാഗം വ്യക്തമാക്കി.

അതേ സമയം തിരഞ്ഞെടുപ്പ് സംബന്ധിച്ച അടിസ്ഥാന പ്രശ്നങ്ങള്‍ പരിഹരിക്കാതെ തിരഞ്ഞെടുപ്പ് നടത്തുന്നതിനെ എതിര്‍ക്കുമെന്ന് യാക്കോബായാ വിഭാഗം അറിയിച്ചു.