തീവ്രവാദ കഥ ഷീബയെ ഞെട്ടിപ്പിക്കുന്നില്ല

ദില്ലി: പാര്‍ലമെന്റ് ആക്രമിച്ച തീവ്രവാദികളിലൊരാളുമായി മലയാളി സ്ത്രീക്ക് ബന്ധമുണ്ടെന്നത് കേവലം കഥ മാത്രം.

ഇങ്ങനെയൊരു കഥ തന്നെ പറ്റി നാട്ടില്‍ പരന്നിട്ടുണ്ടെന്ന് അറിയാതെ ദില്ലി ഇന്ദര്‍പുരിയിലെ വീട്ടില്‍ ഭര്‍ത്താവ് മരിച്ച ദു:ഖം അടക്കിപിടിച്ച് കഴിയുകയാണ് പത്തനംതിട്ട സ്വദേശിയായ ഷീബ.

ദുരൂഹസാഹചര്യത്തിലാണ് ഷീബയുടെ ഭര്‍ത്താവ് നേപ്പാളിയായ ഥാപ്പ മരിച്ചത്. പാര്‍ലമെന്റിനു നേരെ ആക്രണം നടന്ന അതേ ദിവസം. അപ്പോള്‍ നാട്ടിലായിരുന്ന ഷീബ വിവരമറിഞ്ഞ് ദില്ലിയിലേക്ക് വരികയായിരുന്നു. അതിനിടയില്‍ കൊല്ലപ്പെട്ട തീവ്രവാദിയുമായി ഷീബയ്ക്ക് ബന്ധമുണ്ടെന്ന കഥ നാട്ടില്‍ പരക്കുകയും വാര്‍ത്ത യാവുകയും ചെയ്തു. ഭര്‍ത്താവ് മരിച്ച വിവരവുമായി ഷീബയെ തേടിയെത്തിയ ഫോണ്‍ കോളുകളാവണം ഇങ്ങനെയാരു അപവാദത്തിന് വഴിവെച്ചത്.

വഴിവക്കില്‍ മരിച്ച നിലയില്‍ കിടക്കുകയായിരുന്ന ഥാപയെ പൊലീസ് മോര്‍ച്ചറിയിലെത്തിച്ചു. ഥാപയുടെ ഷര്‍ട്ടിന്റെ പോക്കറ്റില്‍ നിന്ന് അയാളുടെ ഓഫീസ് വിലാസവും ഷീബയുടെ കേരളത്തിലെ വിലാസവും ലഭിച്ചു. പൊലീസ് ഥാപയുടെ ഓഫീസിലെ ജീവനക്കാരെ വിവരമറിയിച്ചു. തുടര്‍ന്ന് ഷീബയെ വിവരമറിയിക്കുകയായിരുന്നു.

ദില്ലിയിലെ വീട്ടില്‍ നിന്ന് പുറത്തിറങ്ങാത്ത തന്നെ കുറിച്ച് പ്രചരിച്ച കഥ ഷീബയെ അത്ഭുതപ്പെടുത്തുന്നില്ല. പകരം തന്റെ രണ്ടു മക്കളുടെ ഭാവിയെ കുറിച്ചുള്ള ആകുലതകളാണ് ഷീബയുടെ മനസ് നിറയെ.