ആര്‍സിസിയില്‍ പുതിയ ചികിത്സാസംവിധാനം

തിരുവനന്തപുരം: റീജ്യണല്‍ കാന്‍സര്‍ സെന്ററില്‍ നാല് പുതിയ ചികിത്സാസംവിധാനങ്ങള്‍ നിലവില്‍ വന്നു.

ടെലിമെഡിസിന്‍, തെറട്രോണ്‍ എലൈറ്റ്-60, ക്യുആര്‍ഐ റിമോട്ട് ആഫ്റ്റര്‍ ലോഡിംഗ് ബ്രാര്‍ക്കി തെറാപ്പി യൂണിറ്റ്, ഡെമോണ്‍സ്ട്രേഷന്‍ മൈക്രോസ്കോപ്പ് എന്നിവയാണ് പ്രവര്‍ത്തനം ആരംഭിച്ചത്.

രോഗികള്‍ക്ക് ആര്‍സിസിയിലെത്താതെ തന്നെ ആര്‍സിസി ഡോക്ടര്‍മാരുമായി ബന്ധപ്പെടാന്‍ ടെലിമെഡിസിനിലൂടെ കഴിയും. രോഗികള്‍ അതാതുസ്ഥലങ്ങളിലുള്ള ഡോക്ടര്‍മാരെ സമീപിച്ചാല്‍ മതി. ആ ഡോക്ടര്‍ ടെലിമെഡിസിന്‍ നോഡല്‍ സെന്റര്‍ വഴി ആര്‍സിസി ഡോക്ടര്‍മാരുമായി ചര്‍ച്ച ചെയ്ത് ചികിത്സനടത്തിക്കൊള്ളും. ആര്‍സിസിയുടെ ആഭിമുഖ്യത്തില്‍ പ്രവര്‍ത്തിക്കുന്ന കരുനാഗപ്പള്ളി, എറണാകുളം, പാലക്കാട്, പത്തനംതിട്ട, കണ്ണൂര്‍ എന്നീ കാന്‍സര്‍ പരിശോധനാകേന്ദ്രങ്ങള്‍ ടെലിമെഡിസിന്‍ നോഡല്‍ കേന്ദ്രങ്ങളായി പ്രവര്‍ത്തിക്കും.

റേഡിയേഷന്‍ ചികിത്സനല്കുന്നതിനുള്ള കോബാള്‍ട്ട് 60 ടെലി തെറാപ്പി മെഷീനായ തെറട്രോണ്‍ എലൈറ്റ് 60 ന്റെ പ്രവര്‍ത്തനവും തുടങ്ങി. ദിനംപ്രതി നൂറോളം രോഗികള്‍ക്ക് ഈ യന്ത്രത്തില്‍ ചികിത്സ തേടാം. രണ്ടു കോടിയാണ് ഈ ഉപകരണത്തിന്റെ വില.

ഇന്ത്യയിലെ നിര്‍മ്മിച്ച ആദ്യത്തെ സ്വദേശി കമ്പ്യൂട്ടര്‍ നിയന്ത്രിത റേഡിയോ തെറാപ്പി ഉപകരണമാണ് ക്യുആര്‍ഐ റിമോട്ട് ആഫ്ടര്‍ ലോഡിംഗ് ബ്രാക്കി തെറാപ്പി യൂണിറ്റ്. ഗര്‍ഭാശയ കാന്‍സറിനുള്ള റേഡിയോ തെറാപ്പി ചികിത്സ ഇതിലൂടെ ലഭിക്കും. 25-30 ലക്ഷം ചെലവില്‍ ആര്‍സിസി തന്നെ നിര്‍മ്മിച്ചതാണ് ഈ ഉപകരണം.

ഒരേ സമയം അഞ്ചുപേര്‍ക്ക് മൈക്രോസ്കോപ്പിലൂടെ രോഗനിര്‍ണയം നടത്താന്‍ കഴിയുന്ന ഉപകരണമാണ് ഡെമോണ്‍സ്ട്രേഷന്‍ മൈക്രോസ്കോപ്പ്.