ലഷ്കാറിനെതിരെ നടപടി വേണമെന്ന് ബുഷ്

വാഷിംഗ്ടണ്‍: ലഷ്കാര്‍-എ-തോയിബയ്ക്കും ജയിഷ്-എ-മുഹമ്മദിനുമെതിരെ നടപടി സ്വീകരിക്കാന്‍ യുഎസ് പ്രസിഡന്റ് ജോര്‍ജ് ബുഷ് പാകിസ്ഥാന്‍ പ്രസിഡന്റ് പര്‍വേസ് മുഷാറഫിനോട് ആവശ്യപ്പെട്ടു. പാകിസ്ഥാന്‍ കേന്ദ്രമായി പ്രവര്‍ത്തിക്കുന്ന മറ്റ് തീവ്രവാദി സംഘടനകള്‍ക്കെതിരെ നടപടി സ്വീകരിക്കാനും ആവശ്യപ്പെട്ടിട്ടുണ്ട്.

തീവ്രവാദത്തിനെതിരായ നീക്കങ്ങള്‍ക്ക് മുഷാറഫിന് ബുഷ് പിന്തുണ നല്‍കുമെന്ന് വൈറ്റ് ഹൗസ് പ്രസ് സെക്രട്ടറി അരി ഫ്ലിസ്ചര്‍ പറഞ്ഞു.

പാര്‍ലമെന്റിനും ജമ്മു-കശ്മീര്‍ നിയമസഭയ്ക്കുമെതിരെ നടന്ന ആക്രമണം ഇന്ത്യന്‍ ജനാധിപത്യത്തിനെതിരായ ആക്രമണമാണെന്ന് ഫ്ലിസ്ചര്‍ പറഞ്ഞു. ഇന്ത്യന്‍ നേതാക്കളെ വധിക്കുകയായിരുന്നു തീവ്രവാദികളുടെ ലക്ഷ്യം.

ഒപ്പം തന്നെ പാകിസ്ഥാനെ താഴ്ത്തികെട്ടാനും മെച്ചപ്പെട്ടുവരുന്ന യുഎസ്-പാകിസ്ഥാന്‍ ബന്ധം വഷളാക്കാനും തീവ്രവാദത്തിനെതിരായ ആഗോളതലത്തിലുള്ള പോരാട്ടത്തെ ദുര്‍ബലപ്പെടുത്താനും ഉദ്ദേശിച്ചുള്ളതായിരുന്നു ഈ ആക്രമണങ്ങള്‍.

കശ്മീര്‍ നിയമസഭയ്ക്കും ഇന്ത്യന്‍ പാര്‍ലമെന്റിനും നേരെ നടന്ന ആക്രമണങ്ങളെ മുഷാറഫ് അപലപിച്ചിട്ടുണ്ട്. അക്രമത്തിന് പിന്നില്‍ പ്രവര്‍ത്തിച്ചവര്‍ക്കെതിരെ നടപടി സ്വീകരിക്കുമെന്ന് അദ്ദേഹം വ്യക്തമാക്കിയിരുന്നു- ഫ്ലിസ്ചര്‍ ചൂണ്ടിക്കാട്ടി.