നാളികേര ടെക്നോളജി മിഷന്‍ അടുത്തയാഴ്ച മുതല്‍

പാലക്കാട്: നാളികേര ടെക്നോളിജി മിഷന്റെ പ്രവര്‍ത്തനം അടുത്തയാഴ്ച മുതല്‍ തുടങ്ങുമെന്ന് നാളികേര ബോര്‍ഡ് ചെയര്‍മാന്‍ ഡോ. പി. രതിനം അറിയിച്ചു.

നാളികേര ടെക്നോളജി മിഷനിലൂടെയുണ്ടാവുന്ന സാമ്പത്തിക നേട്ടത്തിന്റെ 80 ശതമാനവും കേരളത്തിനായിരിക്കും ലഭിക്കുകയെന്ന് രതിനം പറഞ്ഞു. ഡിസംബര്‍ 22 ശനിയാഴ്ച പാലക്കാട് പ്രസ് ക്ലബിന്റെ മീറ്റ് ദ പ്രസ് പരിപാടിയില്‍ സംസാരിക്കുകയായിരുന്നു അദ്ദേഹം.

നാളികേരം ഉപയോഗിച്ചുകൊണ്ട് വിവിധ ഉത്പന്നങ്ങള്‍ ഉണ്ടാക്കുന്നതില്‍ ശ്രദ്ധ പതിപ്പിക്കും. വ്യവസായികമായി നാളികേര ഉത്പന്നങ്ങള്‍ ഉത്പാദിപ്പിക്കുന്നതിന് സഹായം നല്‍കും. സ്വകാര്യ മേഖലയ്ക്കും സഹായം ലഭിക്കും. പദ്ധതി ചെലവിന്റെ 25 ശതമാനം മിഷന്‍ നല്‍കും. പദ്ധതി പൂര്‍ത്തിയാക്കിയതിനു ശേഷം ഇത് തിരിച്ചു നല്‍കണം.

നാളികേരത്തിന്റെ ഗവേഷണ-വികസന മേഖലക്ക് ടെക്നോളജി മിഷന്‍ പ്രാധാന്യം നല്‍കും. സ്വകാര്യമേഖലയ്ക്കു ം വ്യക്തികള്‍ക്കുമെല്ലാം ഗവേഷണത്തിനുള്ളസഹായം ലഭിക്കും. നേരത്തെ ഇത് സര്‍ക്കാര്‍ ഏജന്‍സികള്‍ക്ക് മാത്രമാണ് ലഭിച്ചിരുന്നത്. ഗവേഷണത്തിലൂടെ വികസിപ്പിച്ചെടുക്കുന്ന സാങ്കേതിക വിദ്യ ബോര്‍ഡിന് കൈമാറണം.ഇത് പ്രചരിപ്പിക്കാന്‍ ബോര്‍ഡ് സൗകര്യം ചെയ്യും.

നാളികേര ഉത്പന്നങ്ങളുടെയും കള്ള് ഉത്പന്നങ്ങളുടെയും സംഭരണ സംവിധാനത്തിനും സഹായം നല്‍കുമെന്ന് രതിനം അറിയിച്ചു.