കോണ്‍ഗ്രസ് സിപിഎം പോലെയാകരുത്: രാജഗോപാല്‍

തിരുവനന്തപുരം: ഏതു കാര്യത്തിനും സംശയം പ്രകടിപ്പിക്കുന്ന സിപിഎമ്മിനെപ്പോലെ കോണ്‍ഗ്രസ് ആകരുതെന്ന് കേന്ദ്രറെയില്‍വേ സഹമന്ത്രി ഒ. രാജഗോപാല്‍. ഡിസംബര്‍ 13ന് ഇന്ത്യന്‍ പാര്‍ലമെന്റിന് നേരെ നടന്ന ആക്രമണത്തില്‍ ഇടതുപക്ഷത്തിന്റെ വാക്കുകള്‍ കേട്ട് വഴിതെറ്റാതെ യാഥാര്‍ത്ഥ്യബോധത്തോടെ നിലപാടെടുക്കണമെന്നും അദ്ദേഹം പറഞ്ഞു.

ഡിസംബര്‍ 23ഞായറാഴ്ച വാര്‍ത്താസമ്മേളനത്തില്‍ സംസാരിക്കുകയായിരുന്നു അദ്ദേഹം. ദേശീയതാല്പര്യം സംരക്ഷിക്കേണ്ട അവസരങ്ങള്‍ വരുമ്പോള്‍ കമ്മ്യൂണിസ്റുകാര്‍ക്ക് എപ്പോഴും സംശയമാണ്. ചൈനയുമായുള്ള യുദ്ധത്തിന്റെ അവസരത്തിലും കമ്മ്യൂണിസ്റുകാര്‍ ഈ സംശയം പ്രകടിപ്പിച്ചിരുന്നു. ഇപ്പോള്‍ പാര്‍ലമെന്റിനു നേരെ നടത്തിയ ആക്രമണം പാകിസ്ഥാന്‍ നടത്തിയതുതന്നെയാണോ എന്ന് അവര്‍ സംശയിക്കുന്നു. - രാജഗോപാല്‍ ആരോപിച്ചു.

സിപിഎമ്മിന്റെ പ്രേരണമൂലം, പ്രതിസന്ധിയുടെ ഈ ഘട്ടത്തിലും കോണ്‍ഗ്രസ് പ്രതിരോധമന്ത്രിയെ മാറ്റണമെന്നാവശ്യപ്പെട്ട് സമരം ചെയ്യുകയാണ്. ഇത് വളരെ നിര്‍ഭാഗ്യകരമാണ്. - രാജഗോപാല്‍ പറഞ്ഞു.