വിമാനങ്ങള്‍ ഇന്ത്യയിലേക്കയക്കില്ല: പാകിസ്ഥാന്‍

ഇസ്ലാമബാദ്: പാകിസ്ഥാനിലെ യാത്രാവിമാനങ്ങള്‍ ഇന്ത്യയിലേക്കുള്ള സര്‍വീസ് ജനവരി ഒന്നു മുതല്‍ നിര്‍ത്തിവയ്ക്കുമെന്ന് പാകിസ്ഥാന്‍ അറിയിച്ചു. 54 പാക് യാത്രാവിമാനങ്ങള്‍ ഇന്ത്യയിലേക്ക് ഇപ്പോള്‍ സര്‍വീസ് നടത്തുന്നുണ്ട്. ഡിസംബര്‍ 27വ്യാഴാഴ്ച രാത്രി ഏറെ വൈകി പാക് വിദേശകാര്യമന്ത്രാലയം പുറത്തിറക്കിയ വാര്‍ത്താക്കുറിപ്പിലാണ് ഇക്കാര്യങ്ങള്‍ വ്യക്തമാക്കിയിരിക്കുന്നത്.

പാകിസ്ഥാന്റെ വിമാനങ്ങള്‍ ജനവരി ഒന്നു മുതല്‍ ഇന്ത്യന്‍ വ്യോമാതിര്‍ത്തിയ്ക്ക് മുകളിലൂടെ പറക്കരുതെന്ന് ഇന്ത്യ പ്രഖ്യാപിച്ചിരുന്നു. പാര്‍ലമെന്റിനെതിരെ നടന്ന ആക്രമണത്തില്‍ പ്രതിഷേധിച്ചാണ് ഡിസംബര്‍ 27 വ്യാഴാഴ്ച ഇന്ത്യ ഈ തീരുമാനം എടുത്തത്.

ഇന്ത്യയുടെ തീരുമാനത്തില്‍ വിഷമമുണ്ടെന്നും പാകിസ്ഥാന്‍ അറിയിച്ചു. ഇന്ത്യയ്ക്ക് പകരം ചൈനയുടെയും പാകിസ്ഥാന്റെയും വ്യോമാതിര്‍ത്തികളും വിമാനത്താവളങ്ങളും ഉപയോഗിക്കുമെന്നും പാകിസ്ഥാന്‍ അറിയിച്ചു.

ദില്ലിയിലെ പാകിസ്ഥാന്‍ ഹൈക്കമ്മീഷനിലെ ഉദ്യോഗസ്ഥരുടെ എണ്ണം 50 ശതമാനം വെട്ടിക്കുറച്ചതിലും ദു:ഖമുണ്ട്. പാക് ഹൈകമ്മീഷനിലെ ഉദ്യോഗസ്ഥര്‍ ദില്ലി മുനിസിപ്പല്‍ അതിര്‍ത്തിവിട്ട് യാത്രചെയ്യരുതെന്ന ഇന്ത്യയുടെ തീരുമാനത്തിലും ഖേദിക്കുന്നതായി പാക് വിദേശകാര്യമന്ത്രാലയം വാര്‍ത്താക്കുറിപ്പില്‍ പറഞ്ഞു.