കോഴിക്കോഴ: ഉമ്മന്‍ചാണ്ടിക്കും പങ്കുണ്ടെന്ന്

തിരുവനന്തപുരം: തമിഴ്നാട് കേന്ദ്രമായി പ്രവര്‍ത്തിക്കുന്ന ഒമ്പത് ഇറച്ചിക്കോഴി വിപണനസ്ഥാപനങ്ങള്‍ക്ക് 51.8കോടിയുടെ നികുതി ഇളവ് അനുവദിച്ചതില്‍ യുഡിഎഫ് കണ്‍വീനര്‍ ഉമ്മന്‍ചാണ്ടിക്കും പങ്കുണ്ടെന്ന് കേരളാ പൗള്‍ട്രി ഗ്രോവേഴ്സ് അസോസിയേഷന്‍ പ്രസിഡന്റ് ഷാജി മുല്ലക്കരി ആരോപിച്ചു. ധനമന്ത്രി ഈ ഇടപാടില്‍ അഴമതി നടത്തിയതായി പ്രതിപക്ഷനേതാവ് വി.എസ്. അച്യുതാനന്ദന്‍ നേരത്തെ ആരോപിച്ചിരുന്നു.

കേരളത്തിലെ ഇറച്ചിക്കോഴി വളര്‍ത്തല്‍ മേഖലയെ തകര്‍ക്കാന്‍ കൂട്ടുനിന്ന ധനമന്ത്രി ശങ്കരനാരായണന്‍ രാജിവയ്ക്കണമെന്നും അസോസിയേഷന്‍ ഭാരവാഹികള്‍ വാര്‍ത്താസമ്മേളനത്തില്‍ ആവശ്യപ്പെട്ടു. എറണാകുളത്ത് തമിഴ്നാട് കമ്പനികള്‍ നടത്തിയ ഗൂഡാലോചനയില്‍ ഡെപ്യൂട്ടി ടാക്സ് കമ്മീഷണര്‍(ജനറല്‍) പങ്കെടുത്തിരുന്നതായും അവര്‍ പറഞ്ഞു.

തമിഴ്നാട് രാഷ്ട്രീയത്തല്‍ സ്വാധീനമുള്ള കോഴിവ്യാപാരികള്‍ക്കാണ് കേരളസര്‍ക്കാര്‍ അനധികൃതമായി നികുതിയിളവ് അനുവദിച്ചിരിക്കുന്നത്. 1993ല്‍ ഇറക്കിയ സര്‍ക്കാര്‍ വിജ്ഞാപനത്തിന്റെ അടിസ്ഥാനത്തിലാണ് നികുതിയിളവ് അനുവദിച്ചതെന്ന് ധനമന്ത്രി പറയുന്നു. എന്നാല്‍ അതിനുശേഷം നികുതി നിര്‍ബന്ധമാക്കിക്കൊണ്ട് ഇറങ്ങിയ സര്‍ക്കാര്‍ ഉത്തരവുകളെപ്പറ്റി മന്ത്രി മൗനംപാലിക്കുകയാണെന്ന് ഭാരവാഹികള്‍ പറഞ്ഞു.