ശിവഗിരി : ആന്റണി ഖേദം പ്രകടിപ്പിച്ചു

ശിവഗിരി : തന്റെ ഭരണകാലത്ത് മുമ്പ് ശിവഗിരിയിലുണ്ടായ പൊലീസ് നടപടിയില്‍ ഏ.കെ.ആന്റണി ഖേദം പ്രകടിപ്പിച്ചു. 69-ാം ശിവഗിരി തീര്‍ത്ഥാടന സമ്മേളനം ഉദ്ഘാടനം ചെയ്യവെയാണ് മുഖ്യമന്ത്രി ക്ഷമാപണം നടത്തിയത്. അപ്രതീക്ഷിതവും നിര്‍ഭാഗ്യകരവുമായിരുന്നു ആ സംഭവം.

ഒന്നും മനപ്പൂര്‍വമായിരുന്നില്ല,ആത്മാര്‍ത്ഥമായ ഖേദമുണ്ട് തീര്‍ത്ഥാടനത്തിനെത്തിയ ഭക്തജനങ്ങളോട് ആന്റണി പറഞ്ഞു. ഗുരുദേവന്റെ തത്ത്വചിന്തയ്ക്ക് ഇപ്പോള്‍ പ്രസക്തിയേറിയിട്ടുണ്ടെന്നും മുഖ്യമന്ത്രി കൂട്ടിച്ചേര്‍ത്തു.

വൈദ്യുതി മന്ത്രി കടവൂര്‍ ശിവദാസന്‍ അദ്ധ്യക്ഷനായിരുന്നു. ശിവഗിരി ധര്‍മ്മസംഘം പ്രസിഡന്റ് സ്വാമി സ്വരൂപാനന്ദ, സ്വാമി ശാശ്വതീകാനന്ദ എന്നിവരും പങ്കെടുത്തു.