ഒസാമയ്ക്ക് ഐഎസ്ഐ സഹായം: ഖനൂനി

ടെഹ്റാന്‍: പാകിസ്ഥാന്‍ ഇന്റലിജന്‍സ് ഏജന്‍സിയായ ഐഎസ്ഐ ഒസാമ ബിന്‍ ലാദനെ സഹായിക്കുന്നതായി അഫ്ഗാന്‍ ആഭ്യന്തരമന്ത്രി യൂനിസ് ഖനൂനി ആരോപിച്ചു. ഡിസംബര്‍ 29 ശനിയാഴ്ച ഇറാന്‍ ടെലിവിഷനു നല്കിയ അഭിമുഖത്തിലാണ് ഖനൂനി ഇക്കാര്യം വ്യക്തമാക്കിയത്.

ഐഎസ്ഐയുടെ സഹായത്തോടെ ഒസാമ ബിന്‍ ലാദന്‍ പാകിസ്ഥാനിലേക്കും അഫ്ഗാനിസ്ഥാനിലേക്കും വന്നും പോയുംകൊണ്ടിരിക്കുകയാണെന്നും അദ്ദേഹം ആരോപിച്ചു. ഒസാമയുടെ യാത്രകള്‍ മുഴുവന്‍ ഐഎസ്ഐയുടെ നിരീക്ഷണത്തിലാണ്. - അദ്ദേഹം പറഞ്ഞു.

എന്താണ് സംഭവിച്ചുകൊണ്ടിരിക്കുന്നതെന്ന് ഐഎസ്ഐയ്ക്ക് നന്നായി അറിയാം. ബിന്‍ ലാദന്‍ ഇതുവരെ അറസ്റ് ചെയ്യപ്പെട്ടില്ലെന്നതിനര്‍ത്ഥം ബിന്‍ ലാദന് ഐഎസ്ഐയുടെ പിന്തുണയുണ്ടെന്നാണ്. അതേ സമയം പാകിസ്ഥാന്‍ സര്‍ക്കാരിന്റെ നിലപാട് ഐഎസ്ഐയുടേതില്‍ നിന്നും വ്യത്യസ്തമാണെന്നും ഖനൂനി അഭിപ്രായപ്പെട്ടു.

പണ്ട് ചെയ്തിരുന്നതുതന്നെയാണ് ഒസാമബിന്‍ ലാദനും സംഘവും ഇപ്പോഴും ചെയ്യുന്നത്. അവര്‍ സ്ഥലങ്ങള്‍ മാറിക്കൊണ്ടിരിക്കുകയാണ്. അഫ്ഗാനിസ്ഥാന് പുറത്തുപോകുമ്പോള്‍ അദ്ദേഹം പ്രധാനമായും പാകിസ്ഥാനിലേക്കാണ് പോകുന്നത്. അവര്‍ ഒരിക്കലും സ്ഥിരമായി ഒരിടത്തിരിക്കാറില്ല. പ്രധാനമായും പാകിസ്ഥാനിലാണെങ്കിലും ലാദന്‍ അഫ്ഗാനിസ്ഥാനിലായിരിക്കാനും സാധ്യതയുണ്ട്.

ഇതുവരെ അമേരിക്കയ്ക്ക് ലാദനെ കണ്ടുപിടിക്കാന്‍ കഴിഞ്ഞിട്ടില്ലെന്നും ഖനൂനി പറഞ്ഞു.