പുതിയ മദ്യനയം അടുത്തയാഴ്ച

തിരുവനന്തപുരം: അടുത്തയാഴ്ച ചേരുന്ന യുഡിഎഫ് യോഗം മദ്യനയം സംബന്ധിച്ച് അന്തിമതീരുമാനമെടുക്കും. ഇപ്പോഴത്തെ കള്ള്വില്പനരംഗത്തെ കുറവുകളും പരാതികളും പരിഹരിച്ചുകൊണ്ടുള്ളതായിരിക്കും പുതിയ മദ്യനയമെന്ന് കഴിഞ്ഞദിവസം ഉമ്മന്‍ചാണ്ടി വ്യക്തമാക്കിയിരുന്നു.

പക്ഷെ യുഡിഎഫിനെ സംബന്ധിച്ചിടത്തോളം തീരുമാനം ഏതായാലും കുറെപ്പേരെ പിണക്കേണ്ടിവരുമെന്നതാണ് അവസ്ഥ. കള്ള്ഷാപ്പുകള്‍ വീണ്ടും അബ്കാരികള്‍ക്ക് ലഭിക്കത്തക്കവിധം വ്യക്തികള്‍ക്ക് ലേലംചെയ്തുകൊടുക്കാനുള്ള തീരുമാനമെടുത്താല്‍ ബിഷപ്പുമാരും പ്രതിപക്ഷവുമടക്കം വലിയൊരു വിഭാഗത്തിന്റെ എതിര്‍പ്പിനെനേരിടേണ്ടിവരും. കള്ള്ഷാപ്പുകള്‍ വ്യക്തികളെ ഏല്പിച്ചാല്‍ പ്രക്ഷോഭം സംഘടിപ്പിക്കുമെന്ന് കഴിഞ്ഞദിവസവും ബിഷപ്പ് സൂസപാക്യം വ്യക്തമാക്കിയിരുന്നു. വി.എം. സുധീരനെപ്പോലുള്ള തിരുത്തല്‍ ശക്തികള്‍ കോണ്‍ഗ്രസിനകത്തും എതിര്‍പ്പിന്റെ ശബ്ദമുയര്‍ത്തും.

മറിച്ച് കള്ള്ഷാപ്പുകള്‍ അബ്കാരികളില്‍ തിരിച്ചുചെല്ലാത്ത അവസ്ഥയുണ്ടായാല്‍ വെള്ളാപ്പള്ളിയടക്കമുള്ള അബ്കാരിലോബിയില്‍ നിന്നും സര്‍ക്കാരിന് എതിര്‍പ്പുനേരിടേണ്ടിവരും. കഴിഞ്ഞതിരഞ്ഞെടുപ്പിനു മുന്നോടിയായി കോണ്‍ഗ്രസ് രഹസ്യമായി അബ്കാരികള്‍ക്ക് നല്കിയ വാഗ്ദാനത്തിന്റെ ലംഘനംകൂടിയായിരിക്കും അത്. ഇതും കോണ്‍ഗ്രസിനകത്ത് പുതിയ ഉരുള്‍പ്പൊട്ടലുകളുണ്ടാകും.

ഇപ്പോള്‍ തന്നെ കോഴിക്കോഴയും വര്‍ീയകലാപങ്ങളും പൊലീസ്ഭീകരതയും മൂലം പ്രതിച്ഛായതകര്‍ന്നുകൊണ്ടിരിക്കുന്ന ആന്റണിസര്‍ക്കാര്‍ തല്ക്കാലം അബ്കാരികളെ വെറുപ്പിച്ചാലും ഭൂരിഭാഗം അംഗീകരിക്കുന്ന ഒരു മദ്യനയമായിരിക്കും കൈക്കൊള്ളുകയെന്ന് കരുതുന്നു.

തല്ക്കാലം ഭരണത്തിനാകെ ഭീഷണിയാകാത്ത തരത്തില്‍ വലിയൊരു ബഹുജനപ്രക്ഷോഭത്തെ ഇല്ലാതാക്കാനായിരിക്കും ആന്റണിസര്‍ക്കാര്‍ ശ്രമിക്കുകയെന്നും അറിയുന്നു. സമ്പൂര്‍ണ്ണമദ്യനിരോധനം ഘട്ടംഘട്ടമായി നടപ്പിലാക്കുകയെന്ന ലക്ഷ്യത്തോടെയുള്ള നടപടികളായിരിക്കും സര്‍ക്കാര്‍ കൈക്കൊള്ളുകയെന്ന് ഉമ്മന്‍ചാണ്ടി കഴിഞ്ഞദിവസം നടത്തിയ പ്രസ്താവന സര്‍ക്കാര്‍ ഈ വഴിക്കുനീങ്ങുമെന്നതിന്റെ സൂചനയാണ്.