കയറ്റുമതി മേഖലയില്‍ ഓണ്‍ലൈന്‍ സൗകര്യം

കൊച്ചി : കയറ്റുമതി-കയറ്റുമതി സംസ്ക്കരണ യൂണിറ്റുകളില്‍ നിന്നും പല അനുമതികള്‍ക്കും വേണ്ടി വരുന്ന കാലതാമസം ഒഴിവാക്കാന്‍ ഓണ്‍ലൈന്‍ സൗകര്യമൊരുക്കാന്‍ കേന്ദ്ര വാണിജ്യ വകുപ്പ് തീരുമാനിച്ചു. ഫയലുകള്‍ സമര്‍പ്പിക്കുന്നതും അതിന്മേലുളള നടപടികള്‍ സ്വീകരിക്കുന്നതുമെല്ലാം ഇനി ഇന്റര്‍നെറ്റു വഴിയായിരിക്കും. ഇ-ബേസ് എന്ന സൗകര്യം നിലവില്‍ വരുന്നതോടെ കൊച്ചിയിലെ കയറ്റുമതി സംസ്ക്കരണ മേഖലയിലെ നടപടിക്രമങ്ങള്‍ ഇനി എളുപ്പമാകും.

കയറ്റുമതി യൂണിറ്റുകളുമായി ബന്ധപ്പെടുന്നവര്‍ക്ക് പുതിയ സൗകര്യം അനുഗ്രഹമാകുമെന്ന് കരുതുന്നു. വിശാഖ പട്ടണം തുറമുഖത്ത് ആദ്യം ഏര്‍പ്പെടുത്തിയ പദ്ധതി വന്‍ വിജയമായതിനെത്തുടര്‍ന്നാണ് കൊച്ചിയിലേയ്ക്കും വ്യാപിപ്പിക്കാന്‍ തീരുമാനിച്ചത്. ഏപ്രില്‍ അവസാനത്തെടെ അവശേഷിക്കുന്ന ഏഴു തുറമുഖങ്ങളിലേയ്ക്കു കൂടി ഈ സൗകര്യം വ്യാപിപ്പിക്കും.

കയറ്റുമതി സംസ്ക്കരണ മേഖലയിലെ ഉദ്യോഗസ്ഥര്‍, കേന്ദ്ര-സംസ്ഥാന സര്‍ക്കാരുകള്‍, കസ്റംസ് - സെന്‍ട്രല്‍ എക്സൈസ് വകുപ്പുകള്‍ എന്നിവരെ ഓണ്‍ലൈന്‍ വഴി ബന്ധപ്പെടാം. അപേക്ഷ സമര്‍പ്പിക്കലും പരിശോധനയുമൊക്കെ ഈ സംവിധാനം വഴി നടക്കും. അനുമതി നല്‍കുന്നതും ഓണ്‍ലൈന്‍ വഴിയായിരിക്കും. പുതിയ പരിഷ്കാരം കയറ്റുമതി മേഖലയില്‍ സുതാര്യത ഉറപ്പു വരുത്തുമെന്ന് കരുതുന്നു.