ആറു മുതല് അനിശ്ചിതകാല സമരം
തിരുവനന്തപുരം: ആനുകൂല്യങ്ങള് വെട്ടിക്കുറച്ച നടപടിയില് നിന്നും സര്ക്കാര് പിന്തിരിഞ്ഞില്ലെങ്കില് ഫിബ്രവരി ആറു മുതല് അനിശ്ചിതകാലപണിമുടക്കാരംഭിക്കാന് ജീവനക്കാരുടെ സംഘടനകള് തീരുമാനിച്ചു. ഭരണ-പ്രതിപക്ഷ ഭേദമില്ലാതെ ജീവനക്കാരുടെ സംഘടനകള് സംയുക്തമായാണ് ജനവരി 10 വ്യാഴാഴ്ച ഈ തീരുമാനമെടുത്തത്.
ആനുകൂല്യങ്ങള് വെട്ടിക്കുറച്ച സര്ക്കാര് നടപടിയില് പ്രതിഷേധിച്ച് സംസ്ഥാനത്തെ സര്ക്കാര് ജീവനക്കാര് വ്യാഴാഴ്ച നടത്തിയ പണിമുടക്ക് പൂര്ണ്ണമായിരുന്നു. എല്ലാ ജില്ലകളിലും കളക്ടറേറ്റുകളുള്പ്പെടെയുള്ള സര്ക്കാര് ഓഫീസുകളും വിദ്യാഭ്യാസസ്ഥാപനങ്ങളും മെഡിക്കല് കോളേജാശുപത്രികളുള്പ്പെടെയുള്ള സര്ക്കാര് ആശുപത്രികളും സ്തംഭിച്ചു.
സെക്രട്ടേറിയറ്റിന്റെ പ്രവര്ത്തനവും സ്തംഭിച്ചു. സമരത്തെ അടിച്ചമര്ത്താന് സര്ക്കാര് ഡയസ്നോണ് പ്രഖ്യാപിച്ചെങ്കിലും അതൊന്നും വകവയ്ക്കാതെ ഭരണ-പ്രതിപക്ഷവ്യത്യാസമില്ലാതെ ജീവനക്കാരുടെ സംഘടനകള് പണിമുടക്കില് പങ്കെടുത്തു. കേരളത്തിന്റെ സമീപകാല ചരിത്രത്തില് ഇതാദ്യമായാണ് ജീവനക്കാര് കൊടിയുടെ നിറംമറന്ന് സമരത്തിന് ഒന്നിക്കുന്നത്.
തിരുവനന്തപുരത്ത് പണിമുടക്കിയ ജീവനക്കാര് വിജെടിഹാളിനു മുന്നില് നിന്നും സെക്രട്ടേറിയറ്റിലേക്ക് മാര്ച്ച് നടത്തി. ഭരണപക്ഷയൂണിയനുകളും പ്രതിപക്ഷയൂണിയനുകളും പ്രത്യേകം പ്രത്യേകമാണ് മാര്ച്ച് നടത്തിയത്.
തിരുവനന്തപുരത്ത് നടന്ന സര്ക്കാര് സെക്രട്ടറിമാരുടെ യോഗം ഉപരോധിക്കാന് സമരക്കാര് ശ്രമിച്ചു. എന്നാല് പൊലീസ് ഇവരെ അറസ്റ് ചെയ്ത് നീക്കി.