മകരജ്യോതി കാണാന്‍ പതിനായിരങ്ങള്‍

പന്തളം: മകരജ്യോതികാണാന്‍ ശബരിമലയില്‍ അയ്യപ്പഭക്തന്മാരുടെ അഭൂതപൂര്‍വമായ തിരക്ക്. അയ്യപ്പവിഗ്രഹത്തില്‍ തിരുവാഭരണങ്ങള്‍ ചാര്‍ത്തി ദീപാരാധന നടക്കുന്നനേരമാണ് പൊന്നമ്പലമേട്ടില്‍ മകരജ്യോതി തെളിയുക.

ജനവരി 14 വൈകീട്ടാണിത്. ഏതാണ്ട് മൂന്ന് ലക്ഷം അയ്യപ്പന്മാര്‍ സന്നിധാനത്ത് മകരജ്യോതി കാണാന്‍ തിങ്ങിക്കൂടിയിട്ടുണ്ട്. തിരക്കുമൂലം അപകടങ്ങളുണ്ടാകാതിരിക്കാന്‍ വേണ്ട മുന്‍ കരുതല്‍ എടുത്തിട്ടുണ്ടെന്ന് ദേവസ്വംമന്ത്രി ജി. കാര്‍ത്തികേയന്‍ പറഞ്ഞു.

തിങ്കളാഴ്ച രാവിലെ 11.22നായിരുന്നു മകരസംക്രമപൂജ. മകരസംക്രമത്തോടനുബന്ധിച്ച് തിങ്കളാഴ്ച നെയ്യഭിഷേകം നടന്നു. തിരുവനന്തപുരം കവടിയാര്‍ കൊട്ടാരത്തില്‍ നിന്നും കൊണ്ടുവന്ന അയ്യപ്പമുദ്രയിലെ നെയ്യാണ് ഇതിനുപയോഗിച്ചത്. തന്ത്രി കണ്ഠരര് മോഹനരര് മുഖ്യകാര്‍മ്മികത്വം വഹിച്ചു.

മകരജ്യോതിയോടെ, മകരവിളക്ക് ഉത്സവത്തിന് പരിസമാപ്തിയാകും. അതോടെ ഒരു ശബരിമലതീര്‍ത്ഥാടനക്കാലം കൂടി അവസാനിക്കും. ശബരിമലയില്‍ അടുത്തകൊല്ലം കൂടുതല്‍ വികസനപരിപാടികള്‍ നടപ്പാക്കുമെന്ന് ദേവസ്വം ബോര്‍ഡ് പ്രസിഡന്റ് ഡോ. എന്‍. ബാബു പറഞ്ഞു.

ആയിരക്കണക്കിന് അയ്യപ്പന്മാരുടെ കണ്ഠങ്ങളില്‍ നിന്നുയര്‍ന്ന ശരണഘോഷങ്ങളുടെ അകമ്പടിയോടെയാണ് ജനവരി 12 ശനിയാഴ്ച തിരുവാഭരണ ഘോഷയാത്ര പുറപ്പെട്ടത്.