ജയലളിത ആണ്ടിപ്പെട്ടി സ്ഥാനാര്‍ത്ഥി

ചെന്നൈ: ആണ്ടിപ്പെട്ടി നിയമസഭാസീറ്റില്‍ ജയലളിത മത്സരിക്കും. ജയലളിതയെ ഇവിടെ സ്ഥാനാര്‍ത്ഥിയാക്കാന്‍ ജനവരി 16 വ്യാഴാഴ്ചയാണ് എഐഎഡിഎംകെ തീരുമാനിച്ചത്. ഫിബ്രവരി 21നാണ് തിരഞ്ഞെടുപ്പ്.

ഇടുക്കിക്ക് സമീപമുള്ള തേനിയിലാണ് ആണ്ടിപ്പെട്ടി നിയോജകമണ്ഡലം. തമിഴ്നാട്ടില്‍ ഉപതിരഞ്ഞെടുപ്പ് നടക്കേണ്ട മറ്റ് രണ്ട് നിയമസഭാമണ്ഡലങ്ങളായ സെയ്താപെട്ട്, വാണിയമ്പാടി എന്നിവിടങ്ങളിലെ തിരഞ്ഞെടുപ്പ് നീട്ടിവച്ചതിനു തൊട്ടുപിന്നാലെയാണ് ജയലളിതയുടെ സ്ഥാനാര്‍ത്ഥിപ്രഖ്യാപനം വന്നത്. ഈ തിരഞ്ഞെടുപ്പില്‍ വിജയിച്ചാല്‍ ജയലളിത വീണ്ടും തമിഴ്നാട് മുഖ്യമന്ത്രിയാകും.

താന്‍സികേസില്‍ ജയലളിതയെ കഴിഞ്ഞ മാസം മദ്രാസ് ഹൈക്കോടതി കുറ്റവിമുക്തയാക്കിയപ്പോള്‍ തന്നെ ആണ്ടിപ്പെട്ടിയില്‍ നിന്ന് മത്സരിക്കുമെന്ന് ജയലളിത പ്രഖ്യാപിച്ചിരുന്നു.

ആണ്ടിപ്പെട്ടിയില്‍ ഇപ്പോള്‍ എഐഎഡിഎംകെ എംഎല്‍എയായ തങ്കത്തമിഴ് ശെല്‍വന്‍ ജയലളിതയ്ക്ക് മത്സരിക്കാനായി സ്ഥാനമൊഴിയുകയായിരുന്നു.