ചലച്ചിത്രോത്സവം: അപേക്ഷ ക്ഷണിച്ചു

തിരുവനന്തപുരം: കേരള ചലച്ചിത്ര അക്കാദമിയുടെ ഏഴാമത് അന്താരാഷ്ട്ര ചലച്ചിത്രമേളയില്‍ പ്രതിനിധികളാകുവാന്‍ താല്‍പര്യമുള്ളവരില്‍നിന്ന് അപേക്ഷ ക്ഷണിച്ചു. മാര്‍ച്ച് 25 മുതല്‍ ഏപ്രില്‍ ഒമ്പതു വരെയാണ് ഐ.എഫ്.എഫ്.കെ. 2002 എന്ന പേരിലുള്ള ചലച്ചിത്രോല്‍സവം.

അപേക്ഷകള്‍ ബയോഡാറ്റയും റജിസ്ട്രേഷന്‍ ഫീസായ നൂറു രൂപയുടെ ഡിമാന്റ് ഡ്രാഫ്റ്റും സ്വന്തം വിലാസം എഴുതി നാലുരൂപയുടെ സ്റ്റാമ്പ് പതിച്ച കവറും അടക്കം റീജ്യണല്‍ സെക്രട്ടറി, ഫെഡറേഷന്‍ ഓഫ് ഫിലിം സൊസൈറ്റീസ് ഓഫ് ഇന്ത്യ, കലാഭവന്‍, വഴുതയ്ക്കാട്, തിരുവനന്തപുരം എന്ന വിലാസത്തില്‍ ഫിബ്രവരി 15നു മുമ്പ് ലഭിക്കണം.

അക്കാദമിയുടെ വിദഗ്ധ സമിതി അപേക്ഷകള്‍ പരിശോധിച്ച് അര്‍ഹതയുള്ളവര്‍ക്ക് പാസുകള്‍ അനുവദിക്കും. 3000 പേര്‍ക്കാണ് ഇത്തവണ ഡെലിഗേറ്റ് പാസുകള്‍ നല്‍കുന്നത്.

ഇത്തവണ സൗജന്യ പാസുകള്‍ അനുവദിക്കില്ല.

സിനിമാ നിര്‍മ്മാണത്തിന്റെ ഏതെങ്കിലും മേഖലയുമായി നേരിട്ട് ബന്ധമുള്ളവര്‍, ഫിലിം സൊസൈറ്റി പ്രവര്‍ത്തകര്‍, സിനിമാ നിരൂപകര്‍, കോളെജ് ഫിലിം ക്ലബ് അംഗങ്ങള്‍, വാര്‍ത്താലേഖകര്‍, സാഹിത്യ-കലാ സാംസ്കാരിക പ്രവര്‍ത്തകര്‍ എന്നിവര്‍ക്ക് മുന്‍ഗണന ലഭിക്കും.