ഇനി റബര് വേണ്ടെന്ന് ആന്റണി
തിരുവനന്തപുരം : റബര് കൃഷി ഇനിയും വ്യാപിപ്പിക്കരുതെന്ന് മുഖ്യമന്ത്രി. അന്താരാഷ്ട്ര വിപണിയിലെ വിലയിടിവും വിപണിയിലെ അവസ്ഥയും കര്ഷകര് ഉള്ക്കൊളളണം. സംസ്ഥാനം മുഴുവനും റബര് വ്യാപിപ്പിച്ചാല് അത് ഗുണകരമാവില്ല. യാഥാര്ത്ഥ്യം മനസിലാക്കി പുതിയ മേഖലകളിലേയ്ക്കു നീങ്ങാന് അദ്ദേഹം കര്ഷകരോടാവശ്യപ്പെട്ടു.
സംസ്ഥാന ഭൂവിനിയോഗ ബോഡ് സംഘടിപ്പിച്ച നമ്മുടെ ഭൂമി, നമ്മുടെ ഭാവി എന്ന ഏകദിന സെമിനാര് ഉദ്ഘാടനം ചെയ്യുകയായിരുന്നു അദ്ദേഹം. പരമ്പരാഗത കൃഷി രീതി ഉപേക്ഷിച്ച് ആധുനിക സങ്കേതങ്ങള് തേടിയാല് കാര്ഷിക മേഖലയ്ക്കു ഭാവിയുണ്ടാകുമെന്ന് ആന്റണി പറഞ്ഞു.
ശാസ്ത്രീയ ഭൂവിനിയോഗത്തിന് നിയമം കൊണ്ടു വരുമെന്ന് ചടങ്ങില് അദ്ധ്യക്ഷയായിരുന്ന മന്ത്രി കെ ആര് ഗൗരിയമ്മ പ്രസ്താവിച്ചു. ബോഡ് സംഘടിപ്പിച്ച ഫോട്ടോഗ്രാഫി മത്സരത്തില് വിജയിച്ചവര്ക്കുളള സമ്മാനവും മുഖ്യമന്ത്രി വിതരണം ചെയ്തു.