മുല്ലപ്പെരിയാര്‍: നിയമനിര്‍മ്മാണം വരുന്നു

ദില്ലി: മുല്ലപ്പെരിയാര്‍ അണക്കെട്ടിലെ ജലനിരപ്പ് 136 അടിയ്ക് താഴെ നിറുത്താനായി കേരളസര്‍ക്കാര്‍ നിയമ നിര്‍മ്മാണം നടത്തും.

മുല്ലപ്പെരിയാര്‍ സംബന്ധിച്ച കേസ് സുപ്രീം കോടതിയുടെ പരിഗണനയിലുണ്ട്. ഈ സാഹചര്യത്തില്‍ സര്‍ക്കാര്‍ നിയമനിര്‍മ്മാണം നടത്തുന്നത് നിലനില്‍ക്കുമോയെന്ന് നിയമോപദേശം തേടിയിരുന്നു. ഇതിന് തടസമില്ലെന്ന മറുപടിയാണ് സര്‍ക്കാര്‍ നിയോഗിച്ച വക്കീലായ കപില്‍ സിബില്‍ നല്‍കിയത്. കാവേരീ നദീജല പ്രശ്നത്തിലും കപില്‍ സിബിലിനെ കേരളത്തിന്റെ വക്കീലായി നിയോഗിച്ചിട്ടുണ്ട്.

ഈ സാഹചര്യത്തില്‍ നിയമസഭയുടെ ബജറ്റ് സമ്മേളനത്തില്‍ നിയമനിര്‍മ്മാണമുണ്ടാവുമെന്ന് ജലസേചന വകുപ്പ് മന്ത്രി ടി. എം. ജേക്കബ് വ്യക്തമാക്കി.

സുപ്രീം കോടതിയുടെ പരിഗണനയിലിരിക്കുന്ന വിഷയങ്ങളില്‍ സംസ്ഥാനങ്ങള്‍ നിയമനിര്‍മ്മാണം നടത്തുന്നത് തെറ്റല്ലെന്ന് സുപ്രീം കോടതി തന്നെ പലകേസുകളിലും വ്യക്തമാക്കിയിട്ടുണ്ടെന്ന് കപില്‍ സിബില്‍ വ്യക്തമാക്കി.

മുല്ലപ്പെരിയാര്‍ ജലനിരപ്പ് സംബന്ധിച്ച് നിയമനിര്‍മ്മാണം നടത്തണമെന്ന് കേരളത്തിലെ വിവിധ രാഷ്ട്രീയ കക്ഷികള്‍ ആവശ്യമുന്നയിച്ചിരുന്നു. ഈ സാഹചര്യത്തിലാണ് സംസ്ഥാനം നിയമോപദേശം തേടിയത്.

മുല്ലപ്പെരിയാര്‍ - വിവരങ്ങള്‍

മുല്ലപ്പെരിയാര്‍ അണക്കെട്ടിന്റെ ഉയരം 160 അടി.
വെള്ളം സംഭരിക്കാവുന്ന പരമാവധി ഉയരം 154 അടി.
സുരക്ഷിതത്വം കണക്കിലെടുത്ത് വെള്ളം സംഭരിക്കാവുന്ന പരമാവധി ഉയരം 136 അടി.
ഒടുവില്‍ ജലനിരപ്പ് 136 അടി എത്തിയത് 1999 ല്‍
2002 ജനവരിയില്‍ ജലനിരപ്പ് 120 അടി.