14 തീവ്രവാദികളെ പാകിസ്താന്‍ കൈമാറിയേക്കും

ഇസ്ലാമബാദ്: ഇന്ത്യ ആവശ്യപ്പെട്ട 20 തീവ്രവാദികളില്‍ 14 പേരെ വ്യവസ്ഥകള്‍ക്ക് വിധേയമായി വിട്ടയക്കാമെന്ന് പാകിസ്താന്‍. പകരം ഇന്ത്യ പാകിസ്താന് ആവശ്യമുള്ള ചില പാകിസ്താനികളെ വിട്ടയക്കണം.

ഇപ്പോള്‍ ഇന്ത്യയില്‍ ഒളിവില്‍ കഴിയുന്ന കറാച്ചിയിലെ ചില വംശീയസംഘടനകളില്‍പെട്ട തീവ്രവാദികളെ വിട്ടയക്കണമെന്നതാണ് പാകിസ്താന്റെ ആവശ്യം. ഇവരുടെ ലിസ്റും പാകി സ്താന്‍ തയ്യാറാക്കിയിട്ടുണ്ട്. ഈ വ്യവസ്ഥ രണ്ടു ദിവസം മുമ്പ് യുഎസ്വിദേശകാര്യസെക്രട്ടറി കോളിന്‍പവലിനെ പാകിസ്താന്‍ അറിയിച്ചിരുന്നു. ഏകപക്ഷീയമായി കുറ്റവാളികളെ കൈമാറാന്‍ കഴിയില്ലെന്നും പാകി സ്താന്‍ വ്യക്തമാക്കി.

ഇന്ത്യ ആവശ്യപ്പെട്ട 20 പേരില്‍ ഇന്ത്യക്കാരായ 14 പേരെയാണ് പാകിസ്ഥാന്‍ വിട്ടയക്കാമെന്ന് സമ്മതിച്ചിട്ടുള്ളത്.

മാത്രമല്ല 20 പേരില്‍ ബാക്കിയുള്ള ആറു പേരുടെ കാര്യത്തില്‍ ഇന്ത്യ അവകാശമുന്നയിക്കരുതെന്നും പാകിസ്ഥാന്‍ ആവശ്യപ്പെട്ടു. ഈ ആറുപേര്‍ പാകിസ്ഥാനികളായതിനാല്‍ അവരെ യാതൊരു കാരണവശാലും പാകിസ്ഥാന്‍ വിട്ടുതരാന്‍ തയ്യാറല്ല. ഇവരെപ്പറ്റി കൂടുതല്‍ തെളിവുകള്‍ നല്കിയാല്‍ പാകിസ്ഥാന്‍ തന്നെ ഇവരെ പ്രോസിക്യൂട്ട് ചെയ്യുന്ന കാര്യം പരിഗണിക്കും.