തലസ്ഥാനത്ത് ഗതാഗത പരിഷ്കാരങ്ങള്‍

തിരുവനന്തപുരം : നഗരത്തിലെ ബസ് സ്റോപ്പുകള്‍ മാറ്റി സ്ഥാപിക്കാന്‍ തീരുമാനം. യാത്രക്കാരുടെ സൗകര്യം കണക്കിലെടുത്താവും പുനരുദ്ധാരണം. ശനിയാഴ്ച ചേര്‍ന്ന ഗതാഗത ഉപദേശക സമിതി യോഗത്തിലാണ് തീരുമാനമുണ്ടായത്.

ശ്രീ പത്മനാഭ തീയേറ്റര്‍, സെന്‍ട്രല്‍ സ്ക്കൂള്‍, മെഡിക്കല്‍ കോളെജ് എന്നിവയ്ക്കു സമീപമുളള ബസ് സ്റോപ്പുകളാണ് മാറ്റുന്നത്. ഇതോടെ ഈ പ്രദേശത്തെ റോഡിനു വീതി കൂടും.

കിഴക്കേക്കോട്ട ഗാന്ധി പാര്‍ക്കും പട്ടം താണുപിളള പാര്‍ക്കും ഏറെക്കാലമായി തെരുവു വാണിഭക്കാര്‍ കയ്യേറിയിരിക്കുകയാണ്. അട്ടക്കുളങ്ങരയിലുളള അഞ്ചേക്കര്‍ സ്ഥലം ട്രിഡയില്‍ നിന്നു കോര്‍പറേഷന്‍ ഏറ്റെടുത്ത് അവിടെ പ്രൈവറ്റ് ബസ്, ലോറി സ്റാന്‍ഡുകള്‍ നിര്‍മ്മിക്കണമെന്നും യോഗത്തില്‍ നിര്‍ദ്ദേശമുണ്ടായി.

സ്റാച്യൂ, വിജെടി ഹാള്‍, വെള്ളയമ്പലം, ജനറല്‍ ആശുപത്രി, വഴുതക്കാട്, മെഡിക്കല്‍ കോളെജ് ജംഗ്ഷനുകള്‍ എത്രയും പെട്ടെന്ന് വികസിപ്പിക്കും. ദേശീയ പാത ബൈ-പാസില്‍ ആധുനിക വഴിവിളക്കുകള്‍ സ്ഥാപിക്കാനും തീരുമാനമായി. നടപ്പാതയിലെ കച്ചവടക്കാരെ മുഴുവന്‍ ഒഴിപ്പിക്കും.

വാട്ടര്‍ അതോറിറ്റി, വൈദ്യുതി ബോഡ്, ടെലികോം എന്നിവ ഓരോ റോഡിലും നടത്തുന്ന അറ്റകുറ്റപ്പണികളുടെ കണക്കെടുക്കാനും യോഗം തീരുമാനിച്ചു. പണികളെല്ലാം സമയബന്ധിതമായി തീര്‍ക്കുന്നുണ്ടെന്നുപ്പു വരുത്താന്‍ ട്രാഫിക് കമ്മിഷണര്‍, ട്രിഡ, കോര്‍പ്പറേഷന്‍ എന്നിവരെ യോഗം ചുമതലപ്പെടുത്തി.