മദ്രസകളെ നിരീക്ഷിക്കും: വെങ്കയ്യ
തിരുവനന്തപുരം: ഇന്ത്യയുടെ അതിര്ത്തികളില് കൂണുകള് പോലെ മുളച്ചുപൊന്തുന്ന മദ്രസകളുടെ പ്രവര്ത്തനങ്ങള് അവലോകനം ചെയ്യുമെന്ന് കേന്ദ്രഗ്രാമവികസന മന്ത്രി വെങ്കയ്യ നായിഡു പറഞ്ഞു. കേരളത്തില് പര്യടനം നടത്തുന്ന മന്ത്രി ജനവരി 23 ബുധനാഴ്ച വാര്ത്താസമ്മേളനത്തില് സംസാരിക്കുകയായിരുന്നു.
രാജ്യത്താകെ അസ്വാസ്ഥ്യങ്ങള് കൂടിവരുന്ന സാഹചര്യത്തില് മദ്രസ്സകളുടെ പാഠപുസ്തകങ്ങളില് മാറ്റങ്ങള് വരുത്തേണ്ടിവരും. മതമൗലികവാദം കൂടിവരുന്നതിനാല് പാകിസ്താന് പ്രസിഡന്റ് മുഷറഫ് പോലും അവിടെ മദ്രസകള്ക്കെതിരെ തിരിഞ്ഞിരിക്കുകയാണ്.
തീവ്രവാദികള് എല്ലാ അതിര്ത്തിപ്രദേശങ്ങളില്ക്കൂടിയും രാജ്യത്തേക്ക് നുഴഞ്ഞുകയറുകയാണ്. അടുത്തിടെ നടന്ന സംഭവങ്ങള് കണക്കിലെടുത്ത് ജനങ്ങള് രാഷ്ട്രീയവിഭാഗീയതകള് മറന്ന് ഒന്നിക്കണം. പോട്ടോയോടുള്ള എതിര്പ്പ് അവസാനിപ്പിക്കണം. - അദ്ദേഹം പറഞ്ഞു.
സുപ്രീംകോടതി നിര്ദേശപ്രകാരം കേന്ദ്രം അയോധ്യാപ്രശ്നത്തിന് പരിഹാരം കാണണം. ഉത്തര്പ്രദേശിലെ നിയമസഭാതിരഞ്ഞെടുപ്പില് ബിജെപി വിജയിക്കുമെന്നും അദ്ദേഹം പറഞ്ഞു.