ജയലളിത പത്രിക സമര്‍പ്പിച്ചു

ആണ്ടിപ്പെട്ടി: ആണ്ടിപ്പെട്ടി നിയോജകമണ്ഡലത്തില്‍ ജയലളിത നാമനിര്‍ദ്ദേശ പത്രിക സമര്‍പ്പിച്ചു. തേനി ജില്ലയിലാണ് ഉപ തിരഞ്ഞെടുപ്പ് നടക്കുന്ന ആണ്ടിപ്പെട്ടി നിയോജകമണ്ഡലം. ജനവരി 24 നാണ് തമിഴ്നാട്ടിലെ മുന്‍ മുഖ്യമന്ത്രി പത്രിക സമര്‍പ്പിച്ചത്. പിന്നോക്ക സമുദായ ക്ഷേമ വകുപ്പ് ഓഫീസര്‍ പുലമാടനാണ് പത്രിക സ്വീകരിച്ചത്. തേനി ജില്ലാ കളക്ടറേറ്റിലാണ് ഈ ഓഫീസ്. പത്രിക സമര്‍പ്പണം ക്ലോസ് സര്‍ക്യൂട്ട് ടി വി യില്‍ പുറത്തുള്ളവര്‍ക്കായി കാണിച്ചിരുന്നു. കളക്ടറേറ്റില്‍ മുഴുവന്‍ വന്‍ സുരക്ഷാ സന്നാഹമായിരുന്നു. മധുരയില്‍ നിന്ന് ഒട്ടേറെ കാറുകളുടെ അകമ്പടിയോടെയാണ് ജയലളിത പത്രിക സമര്‍പ്പണത്തിന് തേനിയിലെത്തിയത്. മധുരമുതല്‍ തേനി കളക്ടറേറ്റുവരെയുള്ള റോഡ് മുഴുവന്‍ എ ഐ ഡി എം കെ യുടെ പതാക കൊണ്ട് അലങ്കരിച്ചിരുന്നു.

മേയ് 10 ന് നടന്ന തിരഞ്ഞെടുപ്പില്‍ കൃഷ്ണഗിരി, പുതുക്കോട്ട, ഭുവനഗിരി എന്നിവിടങ്ങളില്‍ ജയലളിത നാമനിര്‍ദ്ദേശ പത്രിക നല്‍കിയിരുന്നെങ്കിലും താന്‍സി ഭൂമി ഇടപാട് കേസില്‍ കുറ്റക്കാരിയെന്ന് കോടതി കണ്ടെത്തിയതുകൊണ്ട് അവ തള്ളിക്കളഞ്ഞു.

തുടര്‍ന്ന് ആറുമാസം മുഖ്യമന്ത്രിആയിരുന്ന ജയലളിത രാജിവച്ചു. 2001 ഡിസംബര്‍ നാലിന് ജയലളിതയെ കുറ്റവിമുക്തയാക്കിക്കൊണ്ട് കോടതി വിധി ഉണ്ടായി. ഈ വിധിക്കെതിരെ സുപ്രീം കോടതിയില്‍ അപ്പീല്‍ ഉണ്ട്. പക്ഷേ ഹൈകോടതി കുറ്റവിമുക്തയാക്കിയത് സ്റേചെയ്യാന്‍ സുപ്രീം കോടതി വിസമ്മതിച്ചു. തുടര്‍ന്നാണ് പത്രിക സമര്‍പ്പണത്തിന് അനുകൂലമായ സാഹചര്യം ഉണ്ടായത്.