ഇന്റര്നെറ്റ് നിരക്കുകള് ഗണ്യമായി കുറയും
ദില്ലി : ഇന്ത്യയില് ഇന്റര്നെറ്റ് നിരക്കുകള് കുറയും. 35 മുതല് 40 ശതമാനം വരെ നിരക്കില് കുറവു വരുത്താന് വിഎസ്എന്എല് തീരുമാനിച്ചതോടെയാണിത്.
കമ്പനിയുടെ തീരുമാനത്തിനനുകൂലമായി സര്ക്കാരും പ്രതികരിച്ചതോടെ രാജ്യത്തെ നെറ്റുപയോഗം ചെലവു കുറഞ്ഞതാവും. ചെറുകിട വന്കിട ഇന്റര്നെറ്റ് സേവനദാതാക്കള്ക്ക് ഈ തീരുമാനം ഗുണകരമാകുമെന്ന് വിലയിരുത്തപ്പെടുന്നു.
ഇന്റര്നെറ്റ് സേവനദാതാക്കള്ക്ക് നേരിട്ട് ബാന്റ് വിഡ്ത്ത് വില്ക്കാനുളള അവകാശം ഫ്ലാഗ് ടെലികോം എന്ന ഇന്റര്നെറ്റ് കമ്പനിയ്ക്ക് നല്കിയതായി കേന്ദ്രമന്ത്രി പ്രമോദ് മഹാജന് അറിയിച്ചു. ഫ്ലാഗിന് മുംബൈയിലെ വിഎസ്എന്എല് ഗേറ്റ്വേയിലേക്കെത്തുന്ന കടലിനടിയിലൂടെയുള്ള ഒരു കേബിള് ഉണ്ട്. ബാന്ഡ്വിഡ്ത്ത് നേരിട്ട് ചെറുതും വലുതുമായ ഇന്റര്നെറ്റ് സേവനദാതാക്കള്ക്ക് വില്ക്കാനുള്ള അവകാശംസംബന്ധിച്ച് വിഎസ്എന്എല്ലുമായി ഫ്ലാഗ് ടെലികോം ധാരണയിലെത്തി.
അന്താരാഷ്ട്ര കേബിള് വാഹകരുമായി നേരിട്ട് വിലപേശാന് ഇതുവഴി ഇന്റര്നെറ്റ് സേവന ദാതാക്കള്ക്ക് കഴിയും. വിഎസ്എന്എല്ലിന്റെ കുത്തക അവസാനിക്കുമെന്നര്ത്ഥം. അന്താരാഷ്ട്ര നിരക്കുകള് കുറവായതിനാലും ഇരുകമ്പനികളും തമ്മിലുണ്ടാകുന്ന മത്സരം മൂലവും നെറ്റ് ദാതാക്കള് ഇനി മുതല് ഫ്ലാഗ് ടെലികോമിനു പിറകെ കൂടും.
ഇന്ത്യയുടെ ഐടി വികസനത്തിന് ഈ നീക്കം ഉപകരിക്കുമെന്ന് മഹാജന് അഭിപ്രായപ്പെട്ടു. ടെലികോം റെഗുലേറ്ററി അതോറിറ്റിയുടെ അംഗീകാരത്തിനായി ഈ നിര്ദ്ദേശം സമര്പ്പിച്ചിട്ടുണ്ട്. അംഗീകാരം ലഭിക്കുന്നതോടെ യുദ്ധകാലാടിസ്ഥാനത്തില് ഫ്ലാഗിന് ബാന്ഡ് വിഡ്ത്ത് വില്പനയാരംഭിക്കാം. നിരക്കു സംബന്ധിച്ചും വിഎസ്എന്എല് ഫ്ലാഗുമായി ധാരണയിലെത്തിയെന്ന് മന്ത്രി അറിയിച്ചു.