വീരപ്പന്റെ ഒളിസങ്കേതം വളഞ്ഞു
കോയമ്പത്തൂര് : വീരപ്പന്റെ സത്യമംഗലം കാട്ടിലെ ഒളിസങ്കേതം പ്രത്യേകദൗത്യസേന വളഞ്ഞതായി തമിഴ്നാട് പൊലീസ്. ചെന്നൈ പൊലീസ് കമ്മീഷണര് വിജയകുമാറും സത്യമംഗലം കാട്ടിലേക്ക് കുതിച്ചിട്ടുണ്ട്.
വീരപ്പന് ഉടനെ പിടിയിലായേക്കുമെന്നാണ് തമിഴ്നാട് ഡിജിപി നെയ്വാളിന്റെ അവകാശവാദം. വീരപ്പന്റെ അടുത്ത അനുയായി സേത്തുക്കുളി ഗോവിന്ദനടക്കം നാലോ അഞ്ചോ പേരെ ഇതിനകം തമിഴ്നാട് പൊലീസ് പിടികൂടിയിട്ടുണ്ടെന്നും ഒരു സ്വകാര്യ ടിവി ചാനല് റിപ്പോര്ട്ട് ചെയ്തു.
വീരപ്പനു തിമിരം ബാധിച്ചതായി പൊലീസ് സംശയിക്കുന്നു. കാഴ്ചക്കുറവ് വനഭീകരന്റെ സഞ്ചാരത്തിന് തടസമായിട്ടുണ്ടെന്നാണ് അനുമാനം.
ഈ സാഹചര്യത്തില് ഗ്രാമപ്രദേശത്തെ ഏതെങ്കിലും ആശുപത്രിയില് വീരപ്പനെത്തുമെന്ന പ്രതീക്ഷയിലാണ് പൊലീസ്.
ഡോക്ടറെ താവളത്തിലേയ്ക്ക് തട്ടിക്കൊണ്ടു പോകാന് സാധ്യതയുണ്ടെന്നും പൊലീസിലെ ബുദ്ധികേന്ദ്രങ്ങള് ഊഹിക്കുന്നു. ആസ്ത്മ രോഗിയാണ് വീരപ്പന്. തിമിരവും കൂടിയായതോടെ കക്ഷി ആകെ അവശനായെന്ന് ഡിജിപി പറയുന്നു.
200 പേരുണ്ടായിരുന്ന വീരപ്പന് സംഘം ഇപ്പോള് വെറും എട്ടുപേരായി ചുരുങ്ങിയിട്ടുണ്ട്. ജീവനോടെയോ അല്ലാതെയോ വീരപ്പനെ പിടികൂടുക എന്നതാണ് പൊലീസിന്റെ ലക്ഷ്യം.