ഗ്രൂപ്പിനെതിരെ നിന്നാല് മക്കളെയും അംഗീകരിക്കില്ല
തിരുവനന്തപുരം: ഗ്രൂപ്പിനെതിരെ നില്ക്കുന്നത് മകനും മകളുമായാലും അത് അംഗീകരിക്കില്ലെന്നും മനസുള്ളവര് മാത്രം ഗ്രൂപ്പില് നിന്നാല് മതിയെന്നും മുതിര്ന്ന കോണ്ഗ്രസ് നേതാവ് കെ. കരുണാകരന്.
മക്കള് വീട്ടിലേയുള്ളൂവെന്നും രാഷ്ട്രീയത്തില് അവര് ഗ്രൂപ്പുള്ളവര് തന്നെയാണെന്നും ജനവരി 29 ചൊവാഴ്ച ചേര്ന്ന ഐ ഗ്രൂപ്പ് യോഗത്തില് കരുണാകരന് പറഞ്ഞു. തിരുവനന്തപുരത്തെ കരുണാകരന്റെ വീട്ടിലാണ് യോഗം ചേര്ന്നത്.
വര്ഗീയ കലാപങ്ങളില് കോണ്ഗ്രസുകാര് ഉള്പ്പെട്ടിട്ടില്ല. ഉണ്ടെങ്കില് അത് തെളിയിക്കണം.അവരുടെ പേര് വെളിപ്പെടുത്തണം. അല്ലാതെ കയ്യടി കിട്ടാന് കോണ്ഗ്രസുകാരെ താറടിച്ചു കാട്ടുകയല്ല വേണ്ടത്- കരുണാകരന് പറഞ്ഞു.
ഡിസിസി പുന:സംഘടനയില് അമ്പതു ശതമാനം സ്ഥനങ്ങള് ഐ ഗ്രൂപ്പിന് കിട്ടണമെന്നും ഇക്കാര്യത്തില് യാതൊരു വിട്ടുവീഴ്ചയും ഉണ്ടാവില്ലെന്നും യോഗം വ്യക്തമാക്കി. യോഗത്തില് ആന്റണി സര്ക്കാരിനെതിരെ നിശിത വിമര്ശനമുണ്ടായി.
ഐ ഗ്രൂപ്പ് നേതാവ് കരുണാകരന് മാത്രമാണെന്ന് യോഗം വ്യക്തമാക്കി. പി. പി. തങ്കച്ചന്, രാജ്മോഹന് ഉണ്ണിത്താന്, കെ. പി. കുഞ്ഞിക്കണ്ണന്, കടവൂര് ശിവദാസന്, പത്മജാ വേണുഗോപാല്, പന്തളം സുധാകരന്, സി.എന്. ബോലകൃഷ്ണന്, വി. എസ്. ശിവകുമാര് എംപി എന്നിവര് യോഗത്തില് പങ്കെടുത്തു.