യുഎസ് റിപ്പോര്‍ട്ടറെ വധിക്കും: തീവ്രവാദികള്‍

ഇസ്ലാമബാദ്: തട്ടിക്കൊണ്ടുപോയി തടവില്‍ പാര്‍പ്പിച്ചിരിക്കുന്ന വാള്‍ സ്ട്രീറ്റ് ജേര്‍ണലിലെ റിപ്പോര്‍ട്ടര്‍ ഡാനിയല്‍ പേളിനെ 24 മണിക്കൂറിനുള്ളില്‍ വധിക്കുമെന്ന് പാക് തീവ്രവാദികള്‍. വാള്‍ സ്ട്രീറ്റ് ജേര്‍ണലിന് ജനവരി 31 വ്യാഴാഴ്ച ലഭിച്ച തീവ്രവാദികളുടെ ഒരു ഇ-മെയില്‍ സന്ദേശത്തിലാണ് ഈ ഭീഷണി.

പാകിസ്ഥാനിലെ ചില വാര്‍ത്താമാധ്യമങ്ങള്‍ക്കും ഇതേ ഇ-മെയില്‍ സന്ദേശം ലഭിച്ചു. അതേ സമയം ഡാനിയല്‍ പേളിന്റെ തട്ടിക്കൊണ്ടുപോകലിനു പിന്നില്‍ പ്രവര്‍ത്തിച്ചതായി പൊലീസ് കരുതുന്ന ഷേഖ് മുബാരക് അലി ഗിലാനി എന്ന തീവ്രവാദി ജനവരി 30 ബുധനാഴ്ച കീഴടങ്ങി. പാക് പൊലീസിനു മുമ്പാകെയാണ് ഇയാള്‍ കീഴടങ്ങിയത്.

പേളിനെ തട്ടിക്കൊണ്ടുപോയ സംഭവവുമായി തനിക്ക് ബന്ധമൊന്നുമില്ലെന്നാണ് കീഴടങ്ങിയ ഗിലാനി പറയുന്നത്. അതേ സമയം താന്‍ നൂറുകണക്കിന് തീവ്രവാദികളെ പരിശീലിപ്പിച്ചിരുന്നുവെന്ന് ഗിലാനി വെളിപ്പെടുത്തി. ചോദ്യം ചെയ്യലില്‍ ഇദ്ദേഹത്തില്‍ നിന്നും കാര്യമായ വിവരമൊന്നും ലഭിച്ചിട്ടില്ലെന്ന് പാക് പൊലീസ് അറിയിച്ചു.

ജാമിയത്ത് അല്‍-ഫുക്ര എന്ന നിരോധിച്ച തീവ്രവാദിസംഘത്തില്‍ പെട്ടയാളാണ് ഷേഖ് മുബാരക് അലി. തട്ടിക്കൊണ്ടുപോകപ്പെടുന്നതിന് മുമ്പ് ഡാനിയേല്‍ പേള്‍ ഏറ്റവും ഒടുവില്‍ കൂടിക്കാഴ്ച നടത്തിയത് ഷേഖ് മുബാരക് അലിയുമായാണ്.

പേളിനെ തട്ടിക്കൊണ്ടുപോയ സംഭവത്തില്‍ ഇന്ത്യയ്ക്ക് പങ്കുണ്ടെന്ന് പാകിസ്ഥാന്‍ സൈനികവൃത്തങ്ങള്‍ ആരോപിച്ചു. ഇന്ത്യന്‍ വിദേശകാര്യവക്താവ് നിരുപമാ റാവു വ്യാഴാഴ്ച നടത്തിയ വാര്‍ത്താസമ്മേളനത്തില്‍ ഈ ആരോപണത്തെ പരിഹസിച്ചു.