മനസ് ശുദ്ധീകരിക്കാന് വിശ്വമംഗള പ്രാര്ത്ഥന
കൊച്ചി : മനുഷ്യമനസിനെ ശുദ്ധീകരിക്കാന് വിശ്വമംഗള പ്രാര്ത്ഥന.
നാഷണല് തിങ്കേഴ്സ് ഫോറമാണ് പ്രാര്ത്ഥന സംഘടിപ്പിക്കുന്നത്. ഫിബ്രവരി മൂന്നിന് രാവിലെ എറണാകുളം രാജേന്ദ്ര മൈതാനത്ത് രാവിലെ 10 മുതല് വൈകിട്ട് അഞ്ചുവരെ നീളും. മഹര്ഷി മഹാകവി ഗുരുശ്രീ കൃഷ്ണകുമാര്ജി പ്രാര്ത്ഥനയ്ക്കു നേതൃത്വം നല്കും. പ്രസിദ്ധ ഫലിത സമ്രാട്ട് എന്.നന്ദകിശോര് വിശ്വമംഗള പ്രാര്ത്ഥനയെക്കുറിച്ച് വിശദീകരണ പ്രഭാഷണം നടത്തും.
നല്ല മനുഷ്യര്ക്ക് നന്നായി ജീവിക്കാനുളള സാഹചര്യമൊരുക്കുക എന്ന ലക്ഷ്യത്തോടെ പ്രവര്ത്തിക്കുന്ന സംഘടനയാണ് നാഷണല് തിങ്കേഴ്സ് ഫോറം. ലോകം നന്നാകാന് മനുഷ്യന് നന്നാകണമെന്നും മനുഷ്യന് നന്നാകാന് മനസ് നന്നാകണമെന്നും സംഘടന അനുശാസിക്കുന്നു.
മനുഷ്യമനസിന്റെ ശുദ്ധീകരണം ലക്ഷ്യമാക്കിയുളള പ്രവര്ത്തനത്തിന്റെ ഭാഗമായാണ് വിശ്വമംഗള പ്രാര്ത്ഥന സംഘടിപ്പിക്കുന്നത്. ഈ ലക്ഷ്യം മുന്നിര്ത്തി കഴിഞ്ഞ ജനവരി ഒന്നിന് തൃശൂര് തേക്കന്കാട് മൈതാനത്തും 13ന് മുംബെ ഗോരഗോണിലും പ്രാര്ത്ഥനയും അന്നദാനവും നടത്തി. ഈ ചടങ്ങിലും സത്യത്തിലും ധര്മ്മത്തിലും വിശ്വസിക്കുന്ന രാഷ്ട്രീയ സാമൂഹിക നേതാക്കള് പങ്കെടുക്കണമെന്ന് സംഘടനയുടെ ഭാരവാഹികള് അഭ്യര്ത്ഥിച്ചു.