സര്‍ക്കാര്‍ ജീവനക്കാരുടെ സമരം തുടരുന്നു

തിരുവനന്തപുരം: സര്‍ക്കാര്‍ ജീവനക്കാരുടെ സമരം ഫിബ്രവരി 27 ബുധനാഴ്ച 22 -ാം ദിവസത്തിലെത്തി. ഇപ്പോഴും സമരം ശക്തമായി തുടരുകയാണ്.

ഹാജര്‍ നില കൂടുന്നതായി സര്‍ക്കാര്‍ ദിവസവും കണക്കുകള്‍ നിരത്തുന്നെങ്കിലും ഹാജരില്‍ കാര്യമായ പുരോഗതി ഉണ്ടായിട്ടില്ലെന്നാണ് റിപ്പോര്‍ട്ട്. പിക്കറ്റിങ്ങും അറസ്റും തുടരുകയാണ്.

സമരം അവസാനിപ്പിയ്ക്കാനായി കോണ്‍ഗ്രസ് നേതൃത്ത്വം നല്‍കിയ അന്ത്യശാസനത്തെ എന്‍ ജി ഒ അസോസിയേഷന്‍ തള്ളിക്കളഞ്ഞിരിയ്ക്കയാണ്. കോണ്‍ഗ്രസിന്റെ വെറും ഒരു ചട്ടുകമല്ല സംഘടനയെന്നാണ് സംസ്ഥാന പ്രസിഡന്റ് മങ്ങാട് രാജേന്ദ്രന്റെ നിലപാട്.

ഫിബ്രവരി 26 ചൊവാഴ്ച 45 പേരാണ് സംസ്ഥാനത്ത് അവശ്യ സേവന നിയമപ്രകാരം അറസ്റിലായത്.

ഡി വൈ എഫ് ഐ പ്രവര്‍ത്തകര്‍ പരസ്യമായി തന്നെ സമരക്കാരെ അനുകൂലിച്ച് സമരപരിപാടികളുമായി മുന്നോട്ട് വന്നിട്ടുണ്ട്. ഇതോടെ സമരം കൂടുതല്‍ പ്രക്ഷുബ്ദമാവുമെന്ന് ഉറപ്പായി. മന്ത്രിമാരെ വഴിയില്‍ തടയുമെന്ന് ഡി വൈ എഫ് ഐ പറഞ്ഞിരുന്നു. എന്നാല്‍ ഇതുവരെ ഇത് നടപ്പാക്കി തുടങ്ങിയിട്ടില്ല. സ്വതവേ ദുര്‍ബലനായ മുഖ്യമന്ത്രി എ കെ ആന്റണിയെ വഴിയില്‍ തടയാന്‍ തങ്ങള്‍ക്ക് ഉദ്ദേശമില്ലെന്ന് ഡി വൈ എഫ് ഐ വ്യക്തമാക്കിയിട്ടുണ്ട്. കരുത്താനായ നേതാവ് കരുണാകരനായിരുന്നെങ്കില്‍ വഴിയില്‍ തടയുമെന്നാണ് ഡി വൈ എഫ് ഐ പറയുന്നത്.കരുത്തരായ നേതാക്കന്മാരെ നേരിടാനാണത്രെ ഈ യുവസംഘടനയ്ക് താല്പര്യം.

പ്രതിപക്ഷ ട്രേഡ് യൂണയനുകള്‍ മാര്‍ച്ച് അഞ്ചിന് പൊതുപണിമുടക്ക് ആഹ്വാനം ചെയ്തിരിയ്ക്കുകയാണ്. അതായത് ബന്ദ് ആഹ്വാനമാണിത്. പണിമുടക്ക് കാരണം മാന്ദ്യത്തിലായ കേരളം അന്ന് നിശ്ചലമാവും എന്ന് വേണം കരുതാന്‍.