വിഎച്ച്പി അയയുന്നു

ദില്ലി: അയോധ്യാ പ്രശ്നത്തില്‍ തങ്ങളുടെ കടുത്ത നിലപാടില്‍ വി എച്ച് പി അയവ് വരുത്തുന്നു. കേന്ദ്രസര്‍ക്കാരിന്റെയും ആര്‍ എസ് എസിന്റെയും സമ്മര്‍ദ്ദം മൂലം വി എച്ച് പി നേതാക്കള്‍ കടുത്ത നിലപാടില്‍ നിന്ന് പിന്നാക്കം പോയേക്കുമെന്നാണ് സൂചന.

വി എച്ച് പി അന്തര്‍ദേശീയ വര്‍ക്കിംഗ് പ്രസിഡന്റ് അശോക് സിംഗാളും ആര്‍ എസ് എസ് തലവന്‍ കെ. എസ്. സുദര്‍ശനും വ്യാഴാഴ്ച രാത്രി പ്രശ്നം സംബന്ധിച്ച് ചര്‍ച്ച നടത്തിയിരുന്നു. തങ്ങളുടെ നിലപാടില്‍ അയവ് വരുത്താമെന്ന് സിംഗാള്‍ ചര്‍ച്ചയില്‍ സന്നദ്ധത പ്രകടിപ്പിച്ചുവെന്നാണ് അറിയുന്നത്. ബിജെപി സര്‍ക്കാരിനെ പ്രതിസന്ധിയിലെത്തിക്കുന്നതിന് മാത്രമേ ഇപ്പോഴുള്ള വി എച്ച് പിയുടെ നീക്കം ഉപകരിക്കൂവെന്ന് സംഘ്പരിവാര്‍ നേതാക്കള്‍ ബോധ്യപ്പെടുത്തിയതിനെ തുടര്‍ന്നാണ് സിംഗാള്‍ ഇത്തരമൊരു നിലപാട് സ്വീകരിച്ചത്.

വി എച്ച് പി വൈസ് പ്രസിഡന്റ് ആചാര്യ ഗിരിരാജ് കിഷോറും അന്തര്‍ദേശീയ ജനറല്‍ സെക്രട്ടറി പര്‍വീണ്‍ ഭായിയുമുള്‍പ്പെടെ മറ്റു ചില മുതിര്‍ന്ന വി എച്ച് പി നേതാക്കളും വ്യാഴാഴ്ച ദില്ലിയിലെത്തിയിരുന്നു.

ഗുജറാത്തിലെ കലാപത്തെ തുടര്‍ന്ന് ആര്‍ എസ് എസ് പ്രശ്നത്തില്‍ ഇടപെടണമെന്ന് പ്രധാനമന്ത്രി എ. ബി. വാജ്പേയി ആവശ്യപ്പെട്ടതിനെ തുടര്‍ന്നാണ് സംഘ്പരിവാര്‍ നേതാക്കള്‍ വി എച്ച് പി നേതാക്കളുമായി ചര്‍ച്ച നടത്തിയത്.

എന്‍ ഡി എ കണ്‍വീനറും പ്രതിരോധമന്ത്രിയുമായ ജോര്‍ജ് ഫെര്‍ണാണ്ടസ്, കേന്ദ്ര മാനുഷിക വിഭവശേഷി മന്ത്രി മുരളി മനോഹര്‍ ജോഷി എന്നിവരും സംഘ്പരിവാര്‍ നേതാക്കളെ സന്ദര്‍ശിച്ചിരുന്നു.