പരിഷ്കരണ നടപടികള്‍ തുടരുമെന്ന് ഗവര്‍ണര്‍

തിരുവനന്തപുരം: സാമ്പത്തിക പ്രതിസന്ധി നേരിടുന്നതിന് പരിഷ്കരണ നടപടികളുമായി സര്‍ക്കാര്‍ മുന്നോട്ടുപോവുമെന്ന് ഗവര്‍ണര്‍ സുഖ്ദേവ് സിംഗ് കാംഗ് നിയമസഭയില്‍ നടത്തിയ നയപ്രഖ്യാപന പ്രസംഗത്തില്‍ വ്യക്തമാക്കി.

സാമ്പത്തിക പരിഷ്കരണ നടപടികളല്ലാതെ മറ്റൊരു മാര്‍ഗമില്ലെന്നും പരിഷ്കരണ നടപടികള്‍ സ്വീകരിച്ചില്ലെങ്കില്‍ സംസ്ഥാനം ക്ഷയിക്കുമെന്നും മാര്‍ച്ച് ഒന്ന് വെള്ളിയാഴ്ച ഗവര്‍ണര്‍ നടത്തിയ പ്രഖ്യാപന പ്രസംഗത്തില്‍ ചൂണ്ടിക്കാട്ടി. ബജറ്റ് സമ്മേളനത്തിന്റെ തുടക്കത്തില്‍ നടത്തിയ നയപ്രഖ്യാപന പ്രസംഗമാണിത്.

ചെലവ് ചുരുക്കല്‍ നടപടികളിലൂടെയും മുന്‍ഗണന അനുസരിച്ചുള്ള ഫണ്ട് അനുവദിക്കലിലൂടെയും മികച്ച മാനേജ്മെന്റിലൂടെയും കടുത്ത സാമ്പത്തിക അച്ചടക്കം കൈവരുത്താനാണ് സര്‍ക്കാര്‍ ഉദ്ദേശിക്കുന്നത്. ലോകബാങ്ക്, ഏഷ്യന്‍ വികസന ബാങ്ക് തുടങ്ങിയ ഏജന്‍സികളില്‍ നിന്നും വായ്പ ലഭിക്കുന്നതിന് സര്‍ക്കാര്‍ ശ്രമം നടത്തിവരികയാണ്.

വിനോദ സഞ്ചാരത്തിനും ഐടിയ്ക്കും കൂടുതല്‍ പ്രാധ്യാനം നല്‍കും. ഉന്നതവിദ്യാഭ്യാസം ഗുണപപരമായി മെച്ചപ്പെടുത്തുന്നതിനുള്ള നടപടികള്‍ സ്വീകരിക്കും. പുതിയ ക്ഷേമ പദ്ധതികളൊന്നും പ്രഖ്യാപിച്ചിട്ടില്ല.