സമരം: ഒത്തുതീര്പ്പ് ചര്ച്ചകള് ഊര്ജിതം
തിരുവനന്തപുരം: ജീവനക്കാരുടെ സമരം ഒത്തുതീര്പ്പാക്കാന് യുഡിഎഫ് തന്നെ മുന്കയ്യെടുക്കുന്നു. 24 ദിവസമായി തുടരുന്ന സമരത്തിനിടയില് ഇതാദ്യമായാണ് തലസ്ഥാനത്ത് മാര്ച്ച് ഒന്ന് വെള്ളിയാഴ്ച ഒത്തുതീര്പ്പ് ചര്ച്ചകള് ഊര്ജ്ജിതമായി നടന്നത്.
കോണ്ഗ്രസ് അനുകൂല സംഘടനയായ സെറ്റോയുടെ നേതാക്കളുമായി യുഡിഎഫ് കണ്വീനര് ഉമ്മന്ചാണ്ടിയും കെപിസിസി പ്രസിഡന്റ് കെ. മുരളീധരനും ചര്ച്ച നടത്തി. ചര്ച്ച ഫലപ്രദമായിരുന്നുവെന്ന് കെ. മുരളീധരന് പിന്നീട് വാര്ത്താസമ്മേളനത്തില് അഭിപ്രായപ്പെട്ടു.
സര്ക്കാരിന്റെ പ്രയാസങ്ങള് മനസ്സിലാക്കി അതിനോട് ജീവനക്കാര് സഹകരിക്കുന്ന ഒരു ഫോര്മുലയ്ക്ക് വേണ്ടി ശ്രമിക്കുകയാണെന്ന് മുരളീധരന് പറഞ്ഞു. അല്ലാതെ സര്ക്കാര് ജീവനക്കാരുടെ ആവശ്യങ്ങള്ക്ക് മുന്നില് വഴങ്ങുന്ന പ്രശ്നമില്ലെന്നും മുരളീധരന് വ്യക്തമാക്കി. തുടര്ന്ന് മുരളീധരനും ഉമ്മന്ചാണ്ടിയും മുഖ്യമന്ത്രി ആന്റണിയുമായി ചര്ച്ച നടത്തി.
സര്ക്കാര് ജീവനക്കാരുടെ പണിമുടക്ക് സംബന്ധിച്ച് ഐഎന്ടിയുസി നേതാക്കളും മുഖ്യമന്ത്രിയും തമ്മിലുള്ള ചര്ച്ച പുരോഗമിക്കുകയാണ്.
സര്ക്കാര് ജീവനക്കാരുടെ പണിമുടക്ക് 24-ാം ദിവസത്തിലേക്ക് കടന്ന മാര്ച്ച് ഒന്ന് വെള്ളിയാഴ്ച 13 പേരെ കൂടി എസ്മ പ്രകാരം പൊലീസ് അറസ്റ് ചെയ്തു.വെള്ളിയാഴ്ച വിഎച്ച്പി ഹര്ത്താല് ആഹ്വാനം ചെയ്തതിനാല് സര്ക്കാര് ഓഫീസുകള്ക്ക് മുന്നില് സമര പരിപാടികള് നടന്നില്ല.