തപാല് വകുപ്പ് നിക്ഷേപം സ്വീകരിക്കുന്നത് നിര്ത്തി
കൊച്ചി: വിവിധ നിക്ഷേപ പദ്ധതികളില് നിക്ഷേപം സ്വീകരിക്കുന്നത് തപാല് വകുപ്പ് താത്കാലികമായി നിര്ത്തിവെച്ചു. കേന്ദ്ര ബജറ്റ് പാര്ലമെന്റില് അവതരിപ്പിക്കപ്പെട്ടതിന്റെ പിറ്റേ ദിവസം (മാര്ച്ച് ഒന്ന്) തൊട്ടാണ് നിക്ഷേപം സ്വീകരിക്കുന്നത് നിര്ത്തിയത്.
ചെറിയ നിക്ഷേപ പദ്ധതികളിലെ പലിശ കുറയ്ക്കാന് ബജറ്റ് നിര്ദേശം വന്നതിനെ തുടര്ന്നാണ് നിക്ഷേപം സ്വീകരിക്കുന്നത് നിര്ത്താന് തീരുമാനമായത്. പുതിയ പലിശ നിരക്ക് സംബന്ധിച്ച സര്ക്കുലര് ദില്ലിയില് നിന്ന് പുറപ്പെടുവിക്കും വരെ നിക്ഷേപം സ്വീകരിക്കില്ലെന്ന് തപാല് വകുപ്പ് അധികൃതര് അറിയിച്ചു.
സേവിംഗ്സ് ബാങ്ക്, മന്ത്ലി ഇന്കം സ്കീം (മിസ്), റെക്കറിംഗ് ഡെപോസിറ്റ്സ് (ആര് ഡി) തുടങ്ങിയ വിവിധ പദ്ധതികളിലാണ് നിക്ഷേപം സ്വീകരിക്കുന്നത് നിര്ത്തിവെച്ചത്. അതേ സമയം പബ്ലിക് പ്രോവിഡന്റ് ഫണ്ടിലുള്ള നിക്ഷേപം സ്വീകരിക്കുന്നത് തുടരുന്നുണ്ട്. പബ്ലിക് പ്രോവിഡന്റ് ഫണ്ടിന്റെ പലിശയില് വ്യത്യാസം വരുത്താന് ബജറ്റ് നിര്ദേശമില്ല.
മാര്ച്ച് ഏഴ് വരെ ഈ നില തുടരുമെന്നാണ് തപാല് വകുപ്പ് അധികൃതര് പറയുന്നത്. രാജ്യത്തെ എല്ലാ ഭാഗത്തും ഇതേ സ്ഥിതിയാണെന്നും മാര്ച്ച് ഏഴാവുമ്പോഴേക്കും സര്ക്കുലര് ലഭ്യമാവുമെന്നും കരുതുന്നതായി അവര് പറഞ്ഞു.
അതേ സമയം ചെറുനിക്ഷേപം നടത്തുന്ന സാധാരണക്കാരെ ഈ സ്ഥിതി ബുദ്ധിമുട്ടിലാക്കിയിട്ടുണ്ട്. വേണ്ടത്ര ഭദ്രതയില്ലാത്ത സ്വകാര്യ നിക്ഷേപ പദ്ധതികളില് പണം നിക്ഷേപിക്കാന് അവര് നിര്ബന്ധിതരാവുന്ന സാചര്യമാണ് ഇപ്പോഴുള്ളത്.