സുപ്രിം കോടതിയെ സമീപിക്കുമെന്ന് നിയമ ബോര്‍ഡ്

ദില്ലി: അയോധ്യാപ്രശ്നത്തില്‍ കോടതി ഉത്തരവ് പാലിക്കാമെന്ന് ഉറപ്പ് കൊടുത്തിട്ടില്ലെന്ന വിഎച്ച്പിയുടെ നിലപാട് പ്രശ്നം കൂടുതല്‍ സങ്കീര്‍ണമാവുന്നതിന് വഴിവെക്കുന്നു. കാഞ്ചി ശങ്കരാചാര്യയ്ക്ക് നല്‍കിയ ഉറപ്പില്‍ നിന്ന് വിഎച്ച്പി പിന്നോട്ട് പോവുകയാണെങ്കില്‍ സുപ്രിം കോടതിയെ സമീപിക്കുമെന്ന് മുസ്ലിം വ്യക്തി നിയമ ബോര്‍ഡ് വ്യക്തമാക്കി.

അയോധ്യയില്‍ ക്ഷേത്രം പണിയുന്നതിന് കല്ലുകള്‍ കൊണ്ടുപോവാനുള്ളനീക്കത്തില്‍ നിന്ന് വിഎച്ച്പി പിന്തിരിയണമെന്നും ആവശ്യമെങ്കില്‍ തങ്ങള്‍ സുപ്രിം കോടതിയെ സമീപിക്കുമെന്നും മുസ്ലിം വ്യക്തി നിയമ ബോര്‍ഡ് ചെയര്‍മാന്‍ എസ്.ക്യു.ആര്‍.ഇല്ലിയാസ് പറഞ്ഞു. വിഎച്ച്പിയുടെ നീക്കത്തെ സര്‍ക്കാര്‍ തടയണം. അല്ലെങ്കില്‍ പരമോന്നത നീതിപീഠത്തെ തങ്ങള്‍ക്ക് സമീപിക്കേണ്ടിവരും.

ബോര്‍ഡിലെ ഉന്നത നേതാക്കള്‍ മാര്‍ച്ച് ഏഴ് വ്യാഴാഴ്ച യോഗം ചേരുന്നുണ്ട്.

അയോധ്യാ പ്രശ്നത്തില്‍ കോടതി വിധി വിഎച്ച്പി അനുസരിക്കുമെന്ന് കാഞ്ചി ശങ്കരാചാര്യ തങ്ങള്‍ക്ക് ഉറപ്പ് തന്നിരുന്നതാണ്. ഒന്നുകില്‍ ശങ്കരാചാര്യ തങ്ങളൈ തെറ്റിദ്ധരിപ്പിച്ചതാണ്. അല്ലെങ്കില്‍ വിച്ച്പി നല്‍കിയ ഉറപ്പില്‍ നിന്ന് പിന്തിരിഞ്ഞതാണ്.

ശങ്കരാചാര്യയുടെ നിര്‍ദേശം പിന്‍വലിച്ചിട്ടില്ലാത്തതിനാല്‍ അതേ കുറിച്ച് ചര്‍ച്ച ചെയ്യാന്‍ ബോര്‍ഡിന്റെ എക്സിക്യൂട്ടീവ് കമ്മിറ്റി ഞായറാഴ്ച യോഗം ചേരുമെന്ന് ഇലിയാസ് പറഞ്ഞു.