15ദിവസത്തെ ശമ്പളം നല്കും

തിരുവനന്തപുരം: സമരത്തില്‍ പങ്കെടുത്ത ജീവനക്കാര്‍ക്ക് 15 ദിവസത്തെ ശമ്പളം അഡ്വാന്‍സ് നല്കാന്‍ മന്ത്രിസഭായോഗം തീരുമാനിച്ചു. മാര്‍ച്ച് 20 മുതല്‍ 15ദിവസത്തെ ശമ്പള അഡ്വാന്‍സ് നല്കിത്തുടങ്ങും. ഈ തുക മൂന്നു ഗഡുക്കളായി തിരിച്ചുപിടിക്കും.

സമരത്തില്‍ പങ്കെടുക്കാത്തവര്‍ക്കും അഡ്വാന്‍സ് ശമ്പളം ആവശ്യമെങ്കില്‍ വാങ്ങാം. അവര്‍ക്ക് മാര്‍ച്ച് 15നകം ഫിബ്രവരിയിലെ ശമ്പളം നല്കും. ജോലി ചെയ്തവര്‍ക്കുള്ള ശമ്പളം വിതരണം ചെയ്തശേഷമേ അഡ്വാന്‍സ് ശമ്പളം നല്കൂ.

സമരത്തിനിടെ താല്ക്കാലിക വ്യവസ്ഥയില്‍ ജോലിക്കു കയറിയ ജീവനക്കാര്‍ക്ക് ദിവസവേതനത്തിനു പുറമെ 1000 രൂപ പാരിതോഷികവും പരിചയ സര്‍ട്ടിഫിക്കറ്റും നല്കും. അതാത് ജില്ലാകളക്ടര്‍മാരാണ് സര്‍ട്ടിഫിക്കറ്റ് നല്കുക. ഇനി സര്‍ക്കാര്‍ സര്‍വീസില്‍ താല്ക്കാലിക നിയമനം നടത്തുമ്പോള്‍ സമരത്തിനിടെ ജോലി ചെയ്ത താല്ക്കാലികജീവനക്കാര്‍ക്ക് മുന്‍ഗണനനല്കും.

അക്രമം കാട്ടിയവരുടെ സസ്പെന്‍ഷന്‍ തുടരും. അക്രമസ്വഭാവമുള്ള കേസുകള്‍ പിന്‍വലിക്കില്ല. എസ്മ ഉപയോഗിച്ച് എടുത്ത കേസുകളില്‍ അക്രമസ്വഭാവമില്ലാത്തവ പിന്‍വലിക്കാനും മന്ത്രിസഭായോഗം തീരുമാനിച്ചു. സമരത്തിന്റെ പേരില്‍ ആരെയും പിരിച്ചുവിടുകയോ സ്ഥലം മാറ്റുകയോ ചെയ്യില്ലെന്നും മുഖ്യമന്ത്രി പറഞ്ഞു.