സംസ്ഥാനത്ത് പുതിയ രണ്ടു പദ്ധതികള്‍

തിരുവനന്തപുരം : തൊഴിലില്ലായ്മ പരിഹരിക്കാനും സ്ത്രീ ശാക്തീകരണത്തിനും സംസ്ഥാനത്ത് പുതിയ രണ്ടു പദ്ധതികള്‍.

ബജറ്റിന്മേലുളള പൊതു ചര്‍ച്ചയ്ക്ക് മറുപടി പറയവെ, ധനമന്ത്രി ശങ്കരനാരായണനാണ് പദ്ധതികള്‍ പ്രഖ്യാപിച്ചത്. തൊഴിലില്ലായ്മ പരിഹരിക്കാന്‍ 2,500 കോടിയുടെ ഫണ്ട് രൂപീകരിക്കും. ബാങ്കുകള്‍ വഴിയും പ്രവാസി നിക്ഷേപത്തില്‍ നിന്നുമാണ് ഈ ഫണ്ട് സ്വരൂപിക്കുന്നത്.

സ്ത്രീ ശാക്തീകരണത്തിന് 1,000 കോടിയുടെ ഫണ്ട് രൂപീകരിക്കും. തൊഴിലില്ലായ്മയ്ക്കും വനിതാ ക്ഷേമത്തിനും വേണ്ടി ബജറ്റില്‍ നീക്കി വച്ച തുകയ്ക്കു പുറമെയാണിത്.

മുന്‍ നായനാര്‍ സര്‍ക്കാര്‍ നികുതി പിരിവില്‍ ദയനീയമായി പരാജയപ്പെട്ടെന്ന് ധനമന്ത്രി ആരോപിച്ചു. ലക്ഷ്യമിട്ടതില്‍ നിന്നും 2039.29 കോടി കുറവാണ് മുന്‍ സര്‍ക്കാരിന്റെ കാലത്ത് പിരിഞ്ഞത്. നികുതി കുടിശിക 384.6 ശതമാനമായി ഉയര്‍ന്നെന്നും ശങ്കരനാരായണന്‍ ആരോപിച്ചു.