കേരളത്തില്‍ തീവണ്ടിയട്ടിമറിക്കാന്‍ ശ്രമം

തിരുവനന്തപുരം: കേരളത്തില്‍ തീവണ്ടി അട്ടിമറിക്കാന്‍ അജ്ഞാതശക്തികള്‍ ആരോ ശ്രമിക്കുന്നതായി സംശയം. കഴിഞ്ഞ ദിവസം ആലുവയില്‍ നടന്ന രണ്ട് സംഭവങ്ങളാണ് സംശയം ബലപ്പെടുത്തുന്നത്.

ആലുവ പുളിഞ്ചുവട് ഭാഗത്ത് റെയില്‍പ്പാളം പിളര്‍ന്ന നിലയില്‍ കണ്ടെത്തിയത് കഴിഞ്ഞ ദിവസമാണ്. എന്നാല്‍ ട്രാക്ക്മാന്റെ സമയോചിതമായ ഇടപെടല്‍ മൂലം വലിയൊരു അപകടം ഒഴിവായി. ഏപ്രില്‍ 27 ശനിയാഴ്ച രാവിലെ 9.30ന് പിളര്‍പ്പുള്ള റയില്‍വേ ലൈനിനടുത്തെത്തിയ ബാംഗ്ലൂര്‍-തിരുവനന്തപുരം എക്സ്പ്രസിനെ ട്രാക്ക്മാന്‍ ചുവപ്പുകൊടി കാണിച്ചു നിര്‍ത്തുകയായിരുന്നു. പാലം നെടുകെ പിളര്‍ന്നതിന് കാരണം അറിവായിട്ടില്ല. എന്തായാലും ഇത് അട്ടിമറിശ്രമമാണെന്ന് പൊലീസ് കരുതുന്നു.

മറ്റൊരു അട്ടിമറിശ്രമം നടന്നത് ഏപ്രില്‍ 24 ബുധനാഴ്ചയാണ്. ആലുവ റെയില്‍വേ പാലത്തില്‍ കോണ്‍ക്രീറ്റ് സ്ലാബുകള്‍ ഘടിപ്പിച്ച് ഇതുവഴി ഓടുന്ന തീവണ്ടി അട്ടിമറിക്കാനായിരുന്നു ശ്രമം. ആരാണ് ഇതിന് പിന്നിലെന്ന് അറിവായിട്ടില്ല. എന്നാല്‍ ഒരു ഗുഡ്സ് വണ്ടിയുടെ എഞ്ചിന്‍ ഡ്രൈവര്‍ ഈ സ്ലാബുകള്‍ കണ്ടെത്തിയതിനാല്‍ വലിയൊരു ദുരന്തം ഒഴിവായി.

ആലുവ പൊലീസ് ഈ രണ്ടു സംഭവത്തിലും കേസെടുത്ത് അന്വേഷിക്കുന്നുണ്ട്. പക്ഷെ ഇതുവരെ യാതൊരു തുമ്പും കിട്ടിയിട്ടില്ല. തീവ്രവാദികളാണോ ഈ അട്ടിമറിശ്രമത്തിന് പിന്നിലെന്നും പൊലീസ് സംശയിയ്ക്കുന്നുണ്ട്.