കോട്ടയം മെഡി. കോളെജില് സംഘര്ഷം
കോട്ടയം: നഴ്സിംഗ് വിദ്യാര്ത്ഥികള്ക്കുള്ള പരിശീലനത്തെച്ചൊല്ലി എംജി സര്വകലാശാല നഴ്സിംഗ്വിദ്യാര്ത്ഥികളും കോട്ടയം മെഡിക്കല് കോളെജിലെ നഴ്സിംഗ് വിദ്യാര്ത്ഥികളും തമ്മില് സംഘര്ഷം. മെഡിക്കല് കോളെജില് തങ്ങള്ക്ക് പരിശീലനം അനുവദിക്കുന്നില്ലെന്നതാണ് സ്കൂള് ഓഫ് മെഡിക്കല് എജ്യുക്കേഷനിലെ ബിഎസ്സി നഴ്സിംഗ് വിദ്യാര്ത്ഥികളുടെ പരാതി.
കോട്ടയം കോളെജില് തങ്ങള്ക്ക് പരിശീലനം നല്കണമെന്ന് സര്ക്കാര് ഉത്തരവുണ്ടെന്ന് എംജി സര്വകലാശാലയിലെ നഴ്സിംഗ് വിദ്യാര്ത്ഥികള് അവകാശപ്പെടുന്നു. എന്നിട്ടും തങ്ങള്ക്ക് പരിശീലനം അനുവദിക്കാതിരിക്കുന്നതിന് പിന്നില് മെഡിക്കല് കോളെജിലെ നഴ്സിംഗ് വിദ്യാര്ത്ഥികളാണെന്നും അവര് പരാതിപ്പെടുന്നു.
എംജി സര്വകലാശാലയിലെ നഴ്സിംഗ് വിദ്യാര്ത്ഥികള്ക്ക് കോട്ടയം മെഡിക്കല് കോളെജില് പ്രവേശനം നല്കണമെന്ന് ആവശ്യപ്പെട്ട് ഏപ്രില് 22നാണ് സര്ക്കാര് ഉത്തരവിറക്കിയത്. എംജിയിലെ നഴ്സിംഗ് വിദ്യാര്ത്ഥികള് ഈ പരിശീലനത്തിനുള്ള ഫീസായി 500 രൂപ ആശുപത്രിവികസന സമിതിയ്ക്ക് നല്കുന്നുണ്ട്.
എന്നാല് മെഡിക്കല് കോളെജ് ആശുപത്രിയിലെ സൗകര്യങ്ങള് പരിമിതമാണെന്നും അതിനാല് എസ്എംഇയിലെ വിദ്യാര്ത്ഥികള്ക്ക് പരിശീലനം അനുവദിക്കരുതെന്നുമാണ് മെഡിക്കല് കോളെജിലെ നഴ്സിംഗ് വിദ്യാര്ത്ഥികള് പറയുന്നത്. ഇതോടെ മെഡിക്കല് കോളെജിലെ ഇരുവിഭാഗം നഴ്സിംഗ്വിദ്യാര്ത്ഥികളും തമ്മില് സംഘര്ഷം നിലനില്ക്കുകയാണ്.