പിള്ളയും ഗണേഷും തീവ്രമായി പ്രതികരിക്കുന്നു
തിരുവനന്തപുരം: കെ പി സി സി പ്രസിഡന്റ് കെ. മുരളീധരന്റെ പരാമര്ശങ്ങളോട് കേരള കോണ്ഗ്രസ് നേതാക്കളുടെ തീവ്ര പ്രതികരണം.
യുഡിഎഫ് അംഗത്വം ആരുടെയും ഔദാര്യമല്ലെന്ന് കേരള കോണ്ഗ്രസ് (ബി) ചെയര്മാന് ആര്. ബാലകൃഷ്ണപിള്ള പറഞ്ഞു. മുന്നണി രൂപീകരിക്കാന് കെ. കരുണാകരനോടൊപ്പം താനേ ഉണ്ടായിരുന്നുള്ളൂ. അതിന് വേണ്ടി ഏറെ ത്യാഗങ്ങള് സഹിച്ചതാണ്.
യുഡിഎഫ് ഉന്നതാധികാര സമിതി യോഗത്തില് പങ്കെടുക്കില്ലെന്ന് നേരത്തെ വ്യക്തമാക്കിയതാണ്. മന്ത്രിസഭ അധികാരമേറ്റപ്പോള് തന്നെ ഇക്കാര്യം അറിയിച്ചിരുന്നതാണ്. ബസ് വാടകയ്ക്കെടുത്ത് ഓടിക്കാന് തീരുമാനിച്ചത് മന്ത്രിയല്ല. ധനകാര്യ സെക്രട്ടറിയും നിയമ സെക്രട്ടറിയും അഡീഷണല് ചീഫ് സെക്രട്ടറിയും അടങ്ങുന്ന ബോര്ഡാണ് ഇതു സംബന്ധിച്ച് തീരുമാനമെടുത്തത്- ബാലകൃഷ്ണപിള്ള പറഞ്ഞു.
ആരൊക്കെ എതിര്ത്താലും എയര് ബസ് വാടകയ്ക്കെടുത്ത് ഓടിക്കാനുള്ള തീരുമാനം നടപ്പിലാക്കുമെന്ന് ഗതാഗത മന്ത്രികെ. ബി. ഗണേഷ് കുമാര് പറഞ്ഞു. ഓലപ്പാമ്പിനെ കണ്ട് പേടിക്കില്ല. വേണ്ടിവന്നാല് മുന്നണി വിടാനും തയ്യാറാണ്. മരിക്കും വരെ മന്ത്രിയായിരിക്കണമെന്ന് ആഗ്രഹമൊന്നുമില്ല.
തങ്ങള്ക്ക് തങ്ങളുടേതായ ശക്തിയുണ്ട്. കൊല്ലത്ത് പലരെയും ജയിപ്പിക്കാനും തോല്പിക്കാനും തങ്ങള്ക്ക് കഴിയുമെന്ന് ഗണേഷ് കുമാര് ഓര്മിപ്പിച്ചു.