പുതിയ സ്പീക്കര് : തീരുമാനം നാളയെന്ന് മഹാജന്
ദില്ലി : പുതിയ സ്പീക്കറുടെ കാര്യത്തില് ഉടന് തീരുമാനമാകുമെന്ന് പാര്ലമെന്ററികാര്യ മന്ത്രി പ്രമോദ് മഹാജന്. ബുധനാഴ്ചയോടെ ഇക്കാര്യത്തില് അന്തിമ തീരുമാനമുണ്ടാകുമെന്ന് അദ്ദേഹം അറിയിച്ചു.
പ്രധാനമന്ത്രിയുടെ അനുവാദത്തോടെ എന്ഡിഎ ഘടക കക്ഷികളുമായും പ്രതിപക്ഷവുമായും താന് ഇതു സംബന്ധിച്ച് അനൗപചാരിക ചര്ച്ച തുടങ്ങിയെന്ന് മഹാജന് പറഞ്ഞു.
സ്പീക്കര്പദത്തിന് ആരും അവകാശവാദം ഉന്നയിച്ചിട്ടില്ലെന്ന് അദ്ദേഹം പറഞ്ഞു. മെയ് 10നാണ് തിരഞ്ഞെടുപ്പ് നടത്താന് ഉദ്ദേശിക്കുന്നത്. ബാലയോഗിയും പി. എം. സെയ്ദും എതിരില്ലാതെ തിരഞ്ഞെടുക്കപ്പെട്ട കാര്യം മഹാജന് അനുസ്മരിച്ചു.
പ്രമോദ് മഹാജന് സോണിയാ ഗാന്ധിയെ കണ്ടിരുന്നു. എന്തിനാണ് കൂടി കാഴ്ച എന്ന് വ്യക്തമാക്കിയിട്ടില്ലെങ്കിലും സ്പീക്കറെ തിരഞ്ഞെടുക്കുന്ന കാര്യത്തില് അഭിപ്രായ സമന്വയം ഉണ്ടാക്കായിട്ടാണിതെന്നാണ് കരുതുന്നത്. സ്പീക്കര് സ്ഥാനത്തേയ്ക്ക് കോണ്ഗ്രസ് സ്ഥാനാര്ത്ഥിയെ നിറുത്തുന്നത് തള്ളിക്കളയാനാവില്ലെന്ന് കഴിഞ്ഞ ദിവസം വ്യക്തമാക്കിയിരുന്നു. ഇതാണ് കൂടിക്കാഴ്ചയ്ക്ക് കാരണമായതെന്നാണ് അഭ്യൂഹം. അഭിപ്രായ സമന്വയം ഉണ്ടാക്കി തിരഞ്ഞെടുപ്പ് ഒഴിവാക്കാനാവുമെന്നാണ് ബി ജെ പി കരുതുന്നത്.
ബാലയോഗിയുടെ വിയോഗത്തെ തുടര്ന്ന് തെലുങ്കു ദേശം സ്പീക്കര് പദത്തിലേയ്ക്ക് അവകാശവാദം ഉന്നയിക്കാത്തതിനാല് ബിജെപി നേതാവിനെ സ്പീക്കറാക്കാനാണ് നീക്കം. കഴിഞ്ഞ മാര്ച്ചിലാണ് ഹെലികോപ്റ്റര് അപകടത്തില് ബാലയോഗി മരണമടഞ്ഞത്.