കാണുന്ന ചാനലിനു മാത്രം ഇനി വാടക

ദില്ലി : കാണുന്ന ചാനലിനു മാത്രം വാടക നല്‍കാനുളള സംവിധാനം നിലവില്‍ വരുന്നു. ഇതിനായി 1995 ലെ കേബിള്‍ ടിവി ആക്ട് ഭേദഗദതി ചെയ്യാന്‍ മേയ് ഏഴ്ചൊവാഴ്ച ചേര്‍ന്ന കേന്ദ്ര മന്ത്രിസഭാ യോഗം തീരുമാനിച്ചു. ഉപഭോക്താവ് ഏതു ചാനല്‍ കാണുന്നു എന്നു രേഖപ്പെടുത്തുന്ന ഉപകരണം (സെറ്റ് ടോപ്പ് ബോക്സ്) നിര്‍ബന്ധമാക്കുന്നതിന് ഭേദഗതി സര്‍ക്കാരിനെ അധികാരപ്പെടുത്തും.

സൗജന്യമായി ലഭിക്കുന്ന ചാനലുകള്‍ക്ക് ഒരു നിശ്ചിത വാടക സര്‍ക്കാര്‍ നിശ്ചയിക്കും. അതില്‍ കൂടുതല്‍ ആര്‍ക്കും വാങ്ങാനാവില്ല.

കേബിള്‍ കണക്ഷനുളളവര്‍ എല്ലാ ചാനലിനും വാടക നല്‍കണമെന്ന വ്യവസ്ഥയാണ് ഇപ്പോള്‍ നിലവിലുളളത്. പേ ചാനലുകള്‍ കണ്ടില്ലെങ്കിലും അതിന് ഉപഭോക്താവ് വാടക നല്‍കേണ്ടി വരുന്നു. പുതിയ ഉപകരണം വരുന്നതോടെ ഈ സ്ഥിതി മാറും.

പരീക്ഷണാടിസ്ഥാനത്തില്‍ ആദ്യം ഈ സംവിധാനം മെട്രോ നഗരങ്ങളില്‍ ഏര്‍പ്പെടുത്തും. പിന്നീട് മറ്റിടങ്ങളിലേയ്ക്കും വ്യാപിപ്പിക്കാനാണ് ഉദ്ദേശിക്കുന്നത്.

ചാനല്‍ ഉടമകളും ചില കേബിള്‍ ശൃംഖലകളും കുറേക്കാലമായി ഈ ആവശ്യം ഉന്നയിച്ചിരുന്നു. കൃത്യമായ ഉപഭോക്താക്കളുടെ എണ്ണം കേബിള്‍ ഉടമകള്‍ നല്‍കാത്തതിനാല്‍ തങ്ങള്‍ക്ക് വന്‍ വരുമാന നഷ്ടം ഉണ്ടാകുന്നെന്നാണ് ചാനലുകളുടെ പരാതി.

പക്ഷേ ഈ സെറ്റ് ടോപ്പ് ബോക്സിന് 3500 രൂപയോളം വില വരും. ഇത് ഉപയോക്താവ് നല്‍കണമെന്നാണ് കേബിള്‍ കമ്പനികള്‍ പറയുന്നത്. സര്‍ക്കാര്‍ നിയമത്തില്‍ ഇക്കാര്യം വ്യക്തമാക്കുന്നുമില്ല. ഈ സംവിധാനം ഏര്‍പ്പെടുത്തിയാല്‍ കാണുന്ന ചാനലിനുള്ള വാടക ഇപ്പോള്‍ നാം വൈദ്യുതി ബില്ലും മറ്റും നല്‍കുന്നതുപോലെ നല്‍കുന്ന സംവിധാനം വരുമത്രെ.