കോഴിക്കോട് കളക്ടര്ക്കെതിരെ നടപടി വേണമെന്ന് ചലച്ചിത്ര അക്കാദമി
തിരുവനന്തപുരം: ചലച്ചിത്ര അക്കാദമി ചെയര്മാന് അടൂര് ഗോപാലകൃഷ്ണന് വളരെ മോശപ്പെട്ട രീതിയില് കത്തയച്ച കോഴിക്കോട് ജില്ലാ കളക്ടര് ബിശ്വനാഥ് സിഹ്നയ്ക്കെതിരെ നടപടിയെടുക്കണമെന്ന് മുഖ്യമന്ത്രിയോടും സാംസ്കാരിക മന്ത്രിയോടും ആവശ്യപ്പെടാന് ചലച്ചിത്ര അക്കാദമി എക്സിക്യൂട്ടീവ് കമ്മിറ്റി തീരുമാനിച്ചു.
അടൂരിനെ അപമാനിക്കും വിധത്തില് കത്തയച്ച കളക്ടറുടെ നടപടിയെ വിവിധ ചലച്ചിത്ര സംഘടനകളും അപലപിച്ചു. വളരെ നിരുത്തരവാദപരമായി പെരുമാറിയ കളക്ടര്ക്കെതിരെ ശക്തമായ നടപടി വേണമെന്ന് സംഘടനകള് ആവശ്യപ്പെട്ടു.
മെയ് ഒമ്പത് വ്യാഴാഴ്ചയാണ് കളക്ടര് അടൂരിന് കത്തയച്ചത്. അടൂര് കത്തിന് മറുപടി അയച്ചിട്ടില്ല.
കോഴിക്കോട് വെച്ച് ചലച്ചിത്ര അവാര്ഡ് നിശ നടത്താനാവില്ലെന്ന് കാണിച്ച് നേരത്തെ ബിശ്വനാഥ് സിഹ്ന സാംസ്കാരിക മന്ത്രിയ്ക്ക് കത്തയച്ചതിനെ തുടര്ന്ന് പരിപാടി തിരുവനന്തപുരത്തേക്ക് മാറ്റാന് തീരുമാനിച്ചിരുന്നു. അവധിയില് പോവുകയാണെന്ന് പറഞ്ഞ കളക്ടര് മെയ് 17ന് മാത്രമേ ജോലിയില് തിരികെ പ്രവേശിക്കുകയുള്ളൂവെന്ന് അറിയിച്ചിരുന്നു. 16നാണ് അവാര്ഡ് നിശ. എന്നാല് അവാര്ഡ് നിശ മാറ്റാന് തീരുമാനമായതിനെ തുടര്ന്ന് ഏഴാം തീയതി തന്നെ കളക്ടര് ജോലിയില് തിരികെ പ്രവേശിച്ചു.