ട്രേഡ് യൂണിയന്‍ പിടിയ്ക്കാന്‍ വീണ്ടും പത്മജ

തിരുവനന്തപുരം : ട്രേഡ് യുണിയന്‍ രംഗത്ത് ആധിപത്യമുറപ്പിയ്ക്കാനുളള പത്മജാ വേണുഗോപാലിന്റെ ശ്രമം വീണ്ടും വിവാദമാകുന്നു. ബിഎസ്എന്‍എല്ലില്‍ ഐഎന്‍ടിയുസി സംഘടനയ്ക്കെതിരെ സമാന്തര യൂണിയന്‍ രൂപീകരിച്ച സംഭവമാണ് പുതിയ വിവാദത്തിന് കാരണം. സ്വന്തം സംഘടന പ്രഖ്യാപിച്ച് അതിന്റെ അഖിലേന്ത്യാ പ്രസിഡന്റായി സ്വയം സ്ഥാനമേല്‍ക്കുകയായിരുന്നു പത്മജ.

നാഷണല്‍ യൂണിയന്‍ ഓഫ് ബിഎസ്എന്‍എല്‍ വര്‍ക്കേഴ്സാണ് ഐഎന്‍ടിയുസി ദേശീയഘടകത്തിന്റെ അംഗീകാരമുളള സംഘടന. ഇതിന് ബദലായാണ് ബിഎസ്എന്‍എല്‍ എംപ്ലോയീസ് കോണ്‍ഗ്രസ് എന്ന സംഘടന പത്മജ പ്രഖ്യാപിച്ചത്.

സംഘടനയുടെ ജില്ലാ പ്രസിഡന്റുമാരെ നാമനിര്‍ദ്ദേശം ചെയ്തുകൊണ്ടുളള പ്രഖ്യാപനം കഴിഞ്ഞ ദിവസമുണ്ടായതോടെ ഇരു സംഘടനകളും തമ്മില്‍ ഏറ്റുമുട്ടലിന്റെ പാതയിലാണ്. ജില്ലാതല യോഗങ്ങള്‍ വിളിയ്ക്കാന്‍ പത്മജാ വിഭാഗം തീരുമാനിച്ചിട്ടുണ്ട്. ഈ യോഗങ്ങള്‍ അലങ്കോലപ്പെടുത്താന്‍ എതിര്‍വിഭാഗവും രംഗത്തിറങ്ങിക്കഴിഞ്ഞു.

പത്മജയുടെ വിമത പ്രവര്‍ത്തനങ്ങള്‍ക്ക് തടയിടാന്‍ അടിയന്തരമായി ഇടപെടണമെന്നാവശ്യപ്പെട്ട് സംഘടനയുടെ അഖിലേന്ത്യാ പ്രസിഡന്റ് സഞ്ജീവ റെഡിയ്ക്ക് എതിര്‍വിഭാഗം സന്ദേശമയച്ചിട്ടുണ്ട്. കെഎസ്ഇബിയിലെ ഐഎന്‍ടിയുസി നേതൃസ്ഥാനത്തു നിന്നും എം. എസ്. റാവുത്തരെ പുറത്താക്കിയ ശേഷമുളള പത്മജയുടെ ഈ നടപടിയും രാഷ്ട്രീയ വൃത്തങ്ങള്‍ കൗതുകത്തോടെയാണ് കാണുന്നത്.