ഭാവശുദ്ധിക്ക് കാരണം ഓലമറയിലെ കുളി
കോഴിക്കോട്: ഭാരതസ്ത്രീകളുടെ ഭാവശുദ്ധിക്ക് കാരണമെന്താണ്? ഭാരതസ്ത്രീകള് ഓലകൊണ്ട് മറയിട്ട് കുളിക്കുന്നതുതന്നെ ഇതിന് കാരണം. ഭാരതസ്ത്രീകളുടെ ഭാവശുദ്ധിയെപ്പറ്റി വിവരിക്കാന് പറഞ്ഞപ്പോള് ഒരു പത്താംക്സാസ് വിദ്യാര്ത്ഥിയുടെ ഉത്തരമാണിത്.
വിദേശത്തൊക്കെ ആണും പെണ്ണും ഒരുമിച്ചാണ് കുളിക്കുന്നതെന്നും അതാണ് അവിടത്തെ സ്ത്രീകള്ക്ക് ഭാവശുദ്ധിയില്ലാത്തതെന്നും വിദ്വാന് ഉത്തരക്കടലാസില് തട്ടിവിട്ടിരിക്കുന്നു. എന്തായാലും കോട്ടയ്ക്കല് രാജാസ് ഹയര് സെക്കന്ററി സ്കൂളില് എസ്എസ്എല്സി ഉത്തരക്കടലാസ് മൂല്യനിര്ണ്ണയം നടത്തുന്ന അധ്യാപകര്ക്ക് നിര്ത്താതെ ചിരിക്കാന് വകനല്കുന്ന ഉത്തരങ്ങളാണ് പരക്കെ.
ശീര്ഷകം, ഗുഹരം എന്നീ പദങ്ങളുടെ അര്ത്ഥം ചോദിച്ചപ്പോള് ശീര്ഷകത്തിന് തലക്കെട്ട് എന്ന് ശരിയായ ഉത്തരമെഴുതിയ പയ്യന് പക്ഷെ ഗുഹ എന്ന അര്ത്ഥമുള്ള ഗുഹരം എന്ന വാക്കിന് അരക്കെട്ട് എന്നാണ് ഉത്തരമെഴുതിയത്. തലക്കെട്ടിന് ഒരു അരക്കെട്ടും കൂടിച്ചേര്ന്നാലല്ലെ ഉത്തരങ്ങള്ക്ക് സാമ്യമുണ്ടാകൂ.
സി.വി. രാമന്പിള്ളയുടെ മാര്ത്താണ്ഡവര്മ്മ എന്ന നോവലിലെ കഥാപാത്രമായ സുഭദ്രയുടെ സ്വഭാവവിശേഷങ്ങള് വിവരിക്കാനുള്ള ചോദ്യത്തിന് ഉത്തരമായി അയല്പക്കത്തെ സുഭദ്രച്ചേച്ചിയുടെ സ്വഭാവമഹിമകളാണ് ഒരു വിദ്യാര്ത്ഥി സവിസ്തരം എഴുതി നിറച്ചിരിക്കുന്നത്. പേരച്ചം എന്നാലെന്തെന്ന ചോദ്യത്തിന് ആദ്യമായി പേരിട്ടുവിളിക്കുന്ന അച്ഛനെയാണ് പേരച്ചംഎന്ന് വിളിക്കുന്നതെന്നാണ് മറ്റൊരാളുടെ ഉത്തരം.
തക്കം പാര്ക്കുക എന്നതിനെ സര്ക്കാര് ജീവനക്കാരുടെ സമരവുമായി ബന്ധപ്പെടുത്തിയാണ് ഒരു വിദ്യാര്ത്ഥി വാക്യത്തില് പ്രയോഗിച്ചത്. സര്ക്കാര് ജീവനക്കാര് സമരം ചെയ്യാന് തക്കം പാര്ത്തിരുന്നു എന്നാണ് ഈ വിദ്വാന് വാക്യത്തില് പ്രയോഗിച്ചത്.