സിപിഎം ഐടി പാര്‍ക്ക് തുടങ്ങുന്നു

തിരുവനന്തപുരം : ജില്ലതോറും ഐടി പാര്‍ക്കുകള്‍ സ്ഥാപിയ്ക്കാന്‍ സിപിഎം തീരുമാനം. വീഗാലാന്റിന്റെ മാതൃകയില്‍ രണ്ട് വിനോദ സഞ്ചാര പാര്‍ക്കുകള്‍ തുടങ്ങാനും സിപിഎം സംസ്ഥാനക്കമ്മിറ്റി പച്ചക്കൊടി കാണിച്ചതായി അറിയുന്നു.

കഴിഞ്ഞയാഴ്ച തലസ്ഥാനത്തു ചേര്‍ന്ന പാര്‍ട്ടി സംസ്ഥാനക്കമ്മിറ്റി യോഗം ഇതു സംബന്ധിച്ച് ചര്‍ച്ച നടത്തി. പിണറായി വിജയനാണ് രണ്ടു സംരംഭങ്ങളുടെയും ചുമതല. ജില്ലാ തലസ്ഥാനങ്ങളില്‍ ഓരോ ഐടി പാര്‍ക്കു വീതം സ്ഥാപിയ്ക്കാനാണ് പാര്‍ട്ടി ഉദ്ദേശിയ്ക്കുന്നത്. അമ്യൂസ്മെന്റ് പാര്‍ക്കുകള്‍ തല്‍ക്കാലം രണ്ടു ജില്ലകളിലാകും.

വ്യവസായം തുടങ്ങാനുളള സര്‍ക്കാര്‍ ആനുകൂല്യങ്ങള്‍ മുതലാക്കുന്നതില്‍ ഒരു വീഴ്ചയും വരുത്തരുതെന്ന് പാര്‍ട്ടി തീരുമാനിച്ചിട്ടുണ്ട്.

മാര്‍ക്സിസ്റ് പാര്‍ട്ടി ഇതോടെ പൂര്‍ണമായും വ്യവസായവല്‍ക്കരണത്തിന്റെ പാതയിലാണ്. ഒരു വന്‍ കോര്‍പറേറ്റ് മുതലാളിയുടെ എല്ലാ സ്വഭാവങ്ങളും അദ്ധ്വാന വര്‍ഗത്തിന്റെ പാര്‍ട്ടി നേടിക്കഴിഞ്ഞു. സ്വന്തം ചാനല്‍, പത്രം, മഹാനഗരങ്ങളില്‍ നക്ഷത്ര സൗകര്യങ്ങളുളള സ്മാരക മന്ദിരങ്ങളും ഫ്ലാറ്റുകളും പാര്‍ട്ടി ഓഫീസുകളും, തലശേരിയില്‍ പണികഴിപ്പിയ്ക്കുന്ന ടൂറിസം പദ്ധതി, എറണാകുളത്ത് സൂപ്പര്‍ സ്പെഷ്യാലിറ്റി ആശുപത്രി എന്നിവയൊക്കെ സിപിഎമ്മിന്റെ കീശയിലുണ്ട്.

ഒരു ധനകാര്യ സ്ഥാപനം ( ബ്ലേഡ് കമ്പനിയെന്ന് നാട്ടുകാര്‍) തുടങ്ങാനും ഇടയ്ക്ക് പാര്‍ട്ടി ആലോചിച്ചിരുന്നു. ആശയം നല്ലതായിരുന്നു. പാര്‍ട്ടിയുടെ കൈയില്‍ ഇഷ്ടം പോലെ പണം. വട്ടിപ്പലിശയ്ക്കു കൊടുത്താല്‍ പിരിയ്ക്കാന്‍ നാടൊട്ടുക്ക് ഗുണ്ടാ സംഘങ്ങളും.

മാര്‍ക്സിസ്റ് പാര്‍ട്ടി വളരുകയാണ്.