പൂയംകുട്ടി : വനം മന്ത്രി മലക്കം മറിയുന്നു

തിരുവനന്തപുരം : പൂയംകുട്ടിയില്‍ പുറത്തു നിന്നും വന്ന ആരും കയ്യേറ്റം നടത്തിയില്ലെന്നാണ് താന്‍ പറഞ്ഞതെന്ന് മന്ത്രി സുധാകരന്‍. ഒരു സ്വകാര്യ ചാനലിന് നല്‍കിയ അഭിമുഖത്തിലാണ് പൂയംകുട്ടി വനം കയ്യേറ്റത്തെക്കുറിച്ച് മന്ത്രി നിന്ന നില്‍പ്പില്‍ മലക്കം മറിഞ്ഞത്. അവിടെയുളള ആദിവാസികളാണ് വനം കയ്യേറ്റത്തിന് പിന്നിലെന്നാണ് സുധാകരന്‍ ഇപ്പോള്‍ പറയുന്നത്. ഇവരെ ഒഴിപ്പിയ്ക്കാന്‍ ബുദ്ധിമുട്ടാണത്രേ!

വനംവകുപ്പിന്റെ പൂര്‍ണ നിയന്ത്രണത്തിലുളള പൂയംകുട്ടിയില്‍ വനഭൂമി കയ്യേറിയിട്ടുണ്ടെന്നും മറുപടി പറയേണ്ടത് സുധാകരനാണെന്നും റവന്യൂ മന്ത്രി കെ. എം. മാണി ആരോപിച്ചിരുന്നു. മതികെട്ടാന്‍ വിവാദത്തില്‍ തനിക്കേറ്റ ക്ഷീണം തീര്‍ക്കാന്‍ കാത്തിരുന്ന് നിറയൊഴിയ്ക്കുകയായിരുന്നു മാണി. മാണിയുടെ ആരോപണത്തിന് മറുപടിയായി പൂയംകുട്ടിയില്‍ കയ്യേറ്റമേ നടന്നിട്ടില്ലെന്നായിരുന്നു വനംമന്ത്രിയുടെ ആദ്യ നിലപാട്.

പൂയംകുട്ടിയിലെ ചില ഭാഗങ്ങള്‍ സന്ദര്‍ശിച്ച ശേഷമായിരുന്നു സുധാകരന്‍ ആരോപണം നിഷേധിച്ചത്. എന്നാല്‍ മാദ്ധ്യമ പ്രവര്‍ത്തകര്‍ക്കൊപ്പം പ്രതിപക്ഷ നേതാവ് നടത്തിയ പൂയംകുട്ടി സന്ദര്‍ശനം മന്ത്രിയുടെ അവകാശവാദത്തിന്റെ മുനയൊടിച്ചു. വന്‍തോതില്‍ വനംകയ്യേറിയിരിക്കുന്നത് ദൃശ്യമാദ്ധ്യമങ്ങളിലൂടെ നാട്ടുകാരും കണ്ടു.

തുടര്‍ന്നാണ് മന്ത്രി കളം മാറ്റിച്ചവിട്ടിയത്. പുറത്തു നിന്നെത്തിയ ആരും വനം കയ്യേറിയില്ലെന്നാണ് താന്‍ പറഞ്ഞതെന്നായി ഇപ്പോള്‍. വര്‍ഷങ്ങളായി പൂയംകുട്ടിയില്‍ താമസിയ്ക്കുന്നവരാണ് കയ്യേറ്റക്കാരെന്നും അവരെ ഒഴിപ്പിയ്ക്കാനാവില്ലെന്നുമാണ് മന്ത്രി സ്വകാര്യ ചാനലിനോട് സമ്മതിച്ചത്.

എന്നാല്‍ മെയ് 16 വ്യാഴാഴ്ച ഒരു വെബ്സൈറ്റ് സംഘടിപ്പിച്ച ഓണ്‍ലൈന്‍ സല്ലാപത്തില്‍ പങ്കെടുത്ത്, ആദിവാസികള്‍ക്ക് സര്‍ക്കാര്‍ നല്‍കിയ ഭൂമിയൊഴിച്ച് ബാക്കി തിരിച്ചെടുക്കുമെന്ന് മന്ത്രി പ്രഖ്യാപിച്ചു. കൃത്യം ഒരു മണിക്കൂര്‍ കഴിഞ്ഞ് ചാനല്‍ സംപ്രേക്ഷണം ചെയ്ത അഭിമുഖത്തില്‍ കയ്യേറ്റക്കാരെ ഒഴിപ്പിയ്ക്കാനാവില്ലെന്നും. രണ്ടും കണ്ടവര്‍ കെ. സുധാകരന്‍ തികഞ്ഞ സ്പോര്‍ട്ട്സ് മന്ത്രിയാണെന്ന ്തലകുലുക്കി സമ്മതിയ്ക്കും.