ഫിലിം ചേംബറിനെതിരെ മമ്മൂട്ടിയും മോഹന്ലാലും
തിരുവനന്തപുരം: അമ്മ പ്രസിഡന്റ് ഇന്നസെന്റ് പറഞ്ഞത് അമ്മയിലെ അംഗങ്ങളുടെ വികാരമാണെന്നും അദ്ദേഹത്തിന്റെ ഓരോ വാക്കിന്റെയും ഉത്തരവാദിത്വം അമ്മ ഏറ്റെടുക്കുന്നെന്നും അമ്മ ജനറല് സെക്രട്ടറി മമ്മൂട്ടിയും വൈസ് പ്രസിഡന്റ് മോഹന്ലാലും പ്രസ്താവനയില് പറഞ്ഞു.
ഇന്നസെന്റ് മാപ്പെഴുതി കൊടുത്തതുകൊണ്ട് മലയാള സിനിമയിലെ പ്രതിസന്ധി പരിഹരിക്കാനാവില്ല. അദ്ദേഹത്തെ ഒറ്റപ്പെടുത്താന് ആരെയും അനുവദിക്കില്ല.
ഇന്നസെന്റ് പണം സമ്പാദിച്ചിട്ടുണ്ടെങ്കില് മലയാളത്തിലെ പ്രേക്ഷകര് നല്കിയിട്ടുള്ള പണമാണ്. നടീനടന്മാര്ക്ക് കിട്ടിയ പണത്തിന്റെ കണക്ക് പറയുമ്പോള് കിട്ടാനുള്ള പണത്തിന്റെയും കണക്ക് പറയേണ്ടിവരും.
ഏകപക്ഷീയമായ കുറെ തീരുമാനങ്ങളെടുത്താല് അതിന് വഴങ്ങുമെന്ന് കരുതരുത്. ഫിലിം ചേംബര് പറയുന്ന പ്രതിസന്ധി മലയാളത്തില് പെട്ടെന്ന് പൊട്ടിവീണതല്ല. പ്രതിസന്ധി പരിഹരിക്കാന് പലതും ചെയ്തെങ്കിലും അതുകൊണ്ടൊന്നും പ്രയോജനമുണ്ടായില്ലെന്ന് മമ്മൂട്ടിയും മോഹന്ലാലും പറഞ്ഞു.