ജില്ലാ കളക്ടര്‍ അപമാനിച്ചു: അടൂര്‍

തിരുവനന്തപുരം: കോഴിക്കോട് ജില്ലാ കളക്ടര്‍ തന്നെ അപമാനിച്ചുവെന്ന് ചലച്ചിത്ര അക്കാദമി ചെയര്‍മാനും സംവിധായകനുമായ അടൂര്‍ ഗോപാലകൃഷ്ണന്‍. മെയ് 20 തിങ്കളാഴ്ച വാര്‍ത്താസമ്മേളനത്തില്‍ സംസാരിക്കുകയായിരുന്നു അടൂര്‍.

ജില്ലാ ഭരണാധികാരിയുടെ നിസ്സഹകരണം മൂലമാണ് കോഴിക്കോട് മെയ് 16ന് നടക്കേണ്ടിയിരുന്ന സംസ്ഥാനചലച്ചിത്ര അവാര്‍ഡ് വിതരണം മാറ്റിവച്ചതെന്ന് താന്‍ അഭിപ്രായപ്പെട്ടിരുന്നു. ഇതില്‍ പ്രതിഷേധിച്ചാണ് കോഴിക്കോട് ജില്ലാകളക്ടര്‍ തന്നെയും ചലച്ചിത്ര അക്കാദമിയെത്തന്നെയും അപമാനിക്കുന്ന തരത്തില്‍ കത്തയച്ചതെന്നും അടൂര്‍ അഭിപ്രായപ്പെട്ടു.

സഭ്യേതരമായ തരത്തില്‍ കത്തയക്കാന്‍ സംസ്ഥാന സര്‍വീസ്ചട്ടം അനുവദിക്കുന്നുണ്ടോ എന്ന് ചോദിച്ച് ഞാന്‍ മുഖ്യമന്ത്രിയ്ക്ക് കത്തിന്റെ പകര്‍പ്പടക്കം പരാതി നല്കിയിട്ടുണ്ട്. കോഴിക്കോട് നടക്കാതെ പോയ ചലച്ചിത്രഅവാര്‍ഡ് വിതരണം മെയ് 26ന്തിരുവനന്തപുരത്ത് നടക്കുമെന്നും അടൂര്‍ പറഞ്ഞു.