വ്യവസായ സംഘടനയുമായി ധാരണാപത്രം
കൊച്ചി : ആഗോള നിക്ഷേപകരുടെ സമ്മേളനം സംഘടിപ്പിയ്ക്കാന് കോണ്ഫെഡറേഷന് ഓഫ് ഇന്ത്യന് ഇന്ഡസ്ട്രീസും (സിഐഐ) കേരള സര്ക്കാരും തമ്മില് ധാരണാപത്രം ഒപ്പുവച്ചു.
സമ്മേളനവേദി കൊച്ചിയില് നിന്നും തിരുവനന്തപുരത്തേയ്ക്ക് മാറ്റുന്ന കാര്യം സര്ക്കാരിന്റെ ആലോചനയിലിരിക്കെയാണ് ധാരണാപത്രത്തില് ഒപ്പിട്ടത്. ഉദ്ഘാടനത്തിന് പ്രധാനമന്ത്രി എ. ബി. വാജ്പേയി എത്തുമെന്നാണ് സംഘാടകര് പ്രതീക്ഷിയ്ക്കുന്നത്.
സമ്മേളനത്തിന്റെ നോഡല് ഏജന്സിയായ കേരള വ്യവസായ വികസന കോര്പറേഷന് മാനേജിംഗ് ഡയറക്ടര് ജിജി തോംസണും സിഐഐ കേരളാ കൗണ്സില് ചെയര്പേഴ്സണ് പമേല അന്ന മാത്യുവുമാണ് മന്ത്രി എം. എം. ഹസന്റെ സാന്നിദ്ധ്യത്തില് ധാരണാപത്രം ഒപ്പു വച്ചത്.
സമ്മേളനം നടത്താനുദ്ദേശിച്ചിരിക്കുന്ന ഹാള് അന്നേ ദിവസം മറ്റൊരു പരിപാടിയ്ക്ക് ബുക്ക് ചെയ്യപ്പെട്ടതിനാലാണ് വേദി തിരുവനന്തപുരത്തേയ്ക്ക് മാറ്റുന്ന കാര്യം പരിഗണിയ്ക്കുന്നതെന്ന് ഹസന് പിന്നീട് പറഞ്ഞു. ഇപ്പോള് ദില്ലിയിലുളള മുഖ്യമന്ത്രി പ്രധാനമന്ത്രിയെ സന്ദര്ശിച്ചു കഴിഞ്ഞാലുടന് ഇതില് തീരുമാനമെയുക്കും.
വിവിധ മേഖലകളില് നിക്ഷേപ സാദ്ധ്യതയുളള മേഖലകള് കെഎസ്ഐഡിസിയും സിഐഐയും ചേര്ന്ന് കണ്ടെത്തും. ടൂറിസം, ജൈവ സാങ്കേതിക വിദ്യ, ഭക്ഷ്യസംസ്ക്കരണം എന്നിവയിലാണ് സഹകരണം ഉറപ്പു വരുത്താന് ധാരണാപത്രത്തില് വ്യവസ്ഥയുളളത്.
ധാരണപ്രകാരം സര്ക്കാരും കോര്പറേഷനും സിഐഐയ്ക്ക് അനുസൃതമായ നിയമനിര്മ്മാണം നടത്തണം. നാട്ടിലും വിദേശത്തുമുളള വന്കിട നിക്ഷേപകര്ക്കു മുന്നില് ഒരു ഷോ കേസായി കേരളത്തെ ,സിഐഐ അവതരിപ്പിയ്ക്കുമെന്നാണ് കരാര് വ്യവസ്ഥ ചെയ്യുന്നത്.